घरात कितीही महागडा आणि सुंदर बेड असला, तरी त्यावरची चादर जागोजागी निघालेली असेल, त्यावर सुरकुत्या पडल्या असतील आणि उशा अस्ताव्यस्त पडल्या असतील, तर संपूर्ण खोलीचा लुक खराब दिसतो. अनेक घरांमध्ये सकाळी उठल्यानंतर बेडची अशीच अवस्था पाहायला मिळते. मात्र हॉटेलमध्ये गेल्यानंतर तिथला बेड नेहमीच स्वच्छ आणि नीटनेटका दिसतो. चादरीवर एकही सुरकुती नसते आणि उशाही अगदी व्यवस्थित ठेवलेल्या असतात.
हॉटेलसारखा बेड तयार करण्यासाठी महागडी गादी किंवा खास डिझाइनच्या चादरी घेण्याची गरज नाही. चादर अंथरण्याची योग्य पद्धत, तिचे कोपरे व्यवस्थित गादीखाली दाबणे आणि उशा नीट लावणे अशा छोट्या गोष्टींमुळे बेडचा संपूर्ण लुक बदलू शकतो. अशा सात सोप्या टिप्स जाणून घेऊया.
चादर अंथरण्याची योग्य पद्धत
सर्वात आधी बेड स्वच्छ करा. चादर बदलण्यापूर्वी व्हॅक्यूम क्लिनरच्या मदतीने गादीवरील धूळ काढून घ्या. उशा आणि ब्लँकेटचीही वेळोवेळी स्वच्छता करा. यामुळे बिछाना स्वच्छ राहतो आणि त्याला फ्रेश लुक मिळतो.
त्यानंतर गादीवर चादर व्यवस्थित पसरवा. हाताने चादरीवरील सुरकुत्या काढा आणि चारही बाजूंनी ती सारखी असल्याची खात्री करा. मग चादरीच्या कडा गादीखाली व्यवस्थित दाबून ठेवा. चादर योग्य पद्धतीने अंथरली, तर बेड लगेच नीटनेटका दिसू लागतो.
गादीची स्थितीही वेळोवेळी तपासा. चांगली चादर अंथरल्यानंतरही बेड सुंदर दिसत नसेल, तर त्यामागे जुनी झालेली किंवा मधल्या बाजूने दबलेली गादी हे कारण असू शकते. गादी चांगली असेल पण झोपताना अधिक आराम हवा असेल, तर मॅट्रेस पॅडचा वापर करता येतो. हे गादी आणि चादरीच्या मध्ये अंथरले जाते आणि गादीला अधिक मऊपणा मिळतो.
बेडवर कंफर्टर म्हणजेच जाड चादर वापरत असाल, तर तीही व्यवस्थित अंथरणे गरजेचे आहे. कंफर्टर बेडवर पूर्ण पसरवा आणि दोन्ही बाजूंना त्याचा भाग सारखा ठेवा. त्यावर सुरकुत्या असतील तर हाताने त्या काढून टाका. हवे असल्यास बेडच्या डोक्याकडील बाजूने कंफर्टरचा थोडा भाग दुमडून ठेवता येतो.
दररोजची छोटी सवय, मोठा फरक
रात्री झोपताना चादर विस्कटते आणि उशाही जागेवरून सरकतात. त्यामुळे सकाळी उठल्यानंतर सर्वात आधी बेड नीट करा. चादर सरळ करा, तिचे कोपरे पुन्हा गादीखाली दाबा आणि उशा योग्य जागी ठेवा. ब्लँकेट किंवा कंफर्टर व्यवस्थित पसरून घ्या. यासाठी फार वेळ लागत नाही.
उशा नेहमी बेडच्या डोक्याकडील बाजूला सरळ ठेवा. तुमच्याकडे दोन किंवा चार उशा असतील, तर त्या सारख्या पद्धतीने लावा. उशीच्या कव्हरवरील सुरकुत्याही हाताने काढून टाका. बेड आणखी सुंदर दिसावा यासाठी पुढच्या बाजूला एक किंवा दोन छोटे डेकोरेटिव्ह कुशन ठेवू शकता.
बेड बराच काळ स्वच्छ आणि सुंदर ठेवायचा असेल, तर चादर आणि उशांची कव्हर वेळोवेळी धुणे गरजेचे आहे. गादीवर साचलेली धूळ काढण्यासाठी व्हॅक्यूम क्लिनरचा वापर करा. उशा नियमितपणे फुलवून घ्या. यामुळे उशांचा आकार टिकून राहण्यास मदत होते आणि बेडही अधिक छान दिसतो.
Leave a Reply