नमित मल्होत्रा निर्मित आणि नितेश तिवारी दिग्दर्शित बहुप्रतीक्षित रामायण चित्रपटात भरताची भूमिका साकारणारा अभिनेता आदिनाथ कोठारे सध्या चर्चेत आहे. त्यानं समाजमाध्यमांवर भरत मिलाप – अॅनॅटॉमी ऑफ अ सीन या शीर्षकाखाली एक खास पोस्ट शेअर करत चित्रपटातील महत्त्वाच्या भरत मिलाप प्रसंगाच्या चित्रीकरणादरम्यानचे अनुभव सांगितले आहेत. या पोस्टमधून या प्रसंगामागची तयारी, मनातील दडपण आणि सेटवरील काही खास आठवणी उलगडल्या आहेत.
भरताच्या भूमिकेचं दडपण
संपूर्ण चित्रीकरणादरम्यान आदिनाथ भरत मिलाप या प्रसंगाची आतुरतेनं वाट पाहत होता. नितेश तिवारी यांच्या कथाकथनाच्या शैलीचा तो नेहमीच चाहता राहिला आहे. विशेषतः दंगल हा चित्रपट त्याच्या पिढीसाठी पटकथालेखनाचा एक आदर्श असल्याचंही त्यानं नमूद केलं. मात्र अनेक दिग्गज कलाकारांनी यापूर्वी साकारलेल्या भरतासारख्या महत्त्वपूर्ण व्यक्तिरेखेला आपण कसा न्याय देणार, याचं दडपणही त्याच्या मनात होतं.
चित्रीकरणापूर्वीच्या तालीमदरम्यान नितेश तिवारी यांच्याशी झालेल्या एका छोट्याशा संवादानं आदिनाथचं हे दडपण दूर झालं. आदिनाथच्या ऑडिशनची आठवण करून देत तिवारी यांनी त्याच्या अभिनयातील प्रामाणिकपणाचं कौतुक केलं आणि भरताच्या व्यक्तिरेखेसाठी नेमकी हीच गोष्ट महत्त्वाची असल्याचं सांगितलं. त्यांच्या या शब्दांमुळे आदिनाथचा आत्मविश्वास वाढला आणि मनातील अनावश्यक विचार दूर झाले.
चित्रकूटच्या सेटवरील तो क्षण
आदिनाथला आता थांबवत नव्हतं, त्यामुळे तो तालीमसाठी थेट दिग्दर्शकांच्या व्हॅनिटीकडे गेला. तिवारी यांनी अतिशय आपुलकीनं त्याचं स्वागत केलं आणि त्यामुळे त्याच्या मनात सुरू असलेला विचारांचा गोंधळ क्षणात कमी झाला. दोघंही पटकथा घेऊन समोरासमोर बसले आणि पहिल्याच प्रयत्नात संवाद अचूक व्हावेत, अशी आदिनाथची अपेक्षा होती.
जेव्हा तो चित्रकूटच्या सेटवर पोहोचला, तेव्हा श्रीराम, माता सीता आणि लक्ष्मण यांच्या उपस्थितीमुळे संपूर्ण सेट एका दैवी ऊर्जेनं भारून गेला होता, असं त्यानं लिहिलं. शेवटच्या तयारीसाठी तो आपल्या खुणवर उभा असताना वेशभूषा पथकानं सुधारणा केलेला मुकुट आणला. त्यांच्यासोबत निर्माते नमित मल्होत्रा स्वतः उपस्थित होते आणि तिवारी यांची दृष्टी जशीच्या तशी पडद्यावर उतरावी, यासाठी प्रत्येक छोट्या गोष्टीकडे बारकाईनं लक्ष देत मुकुट व्यवस्थित बसेपर्यंत ते तिथेच थांबले. यावेळी मुकुट अगदी योग्य बसला होता, असं आदिनाथनं सांगितलं.
Leave a Reply