राज्यात सध्या थंडीचे वारे वाहू लागले आहेत. हवामानातील सततच्या बदलांमुळे शरीरासोबतच त्वचा आणि केसांच्या समस्या वाढतात. हाडांमध्ये वेदना, सांधेदुखी आणि कंबरदुखीचा त्रास अनेकांना जाणवतो. थंडीच्या दिवसांत शरीराची रोगप्रतिकारशक्ती कमकुवत होते आणि थकवा व अशक्तपणा वाढतो. अशा वेळी शरीराला पोषक आहाराची गरज असते.
हिवाळ्यात साथीचे आजार मोठ्या प्रमाणावर वाढतात. त्यामुळे रोजच्या आहारात आवळा खाण्याचा सल्ला दिला जातो. आवळ्यामध्ये व्हिटॅमिन सी, लोह आणि अँटीऑक्सिडंट्स मुबलक प्रमाणात असतात. आवळ्याचे सेवन केल्याने केस मजबूत होतात, त्वचेचा रंग उजळतो आणि हाडांना पोषण मिळते. मात्र रोज कच्चा आवळा खाणे अनेकांना आवडत नाही. अशा वेळी आवळ्याचे लाडू हा सोपा आणि चविष्ट पर्याय ठरतो.
आवळा लाडू का खावा?
आवळ्यामध्ये असलेले व्हिटॅमिन सी रोगप्रतिकारशक्तीच्या सामान्य कार्याला मदत करते. आवळा लाडू खाल्ल्याने शरीराला पोषण मिळते. हिवाळ्यात तिखट किंवा तेलकट पदार्थ खाण्याऐवजी आवळ्याचा लाडू खाणे अधिक फायदेशीर ठरते. आवळ्यातील व्हिटॅमिन सी कोलेजन निर्मितीस मदत करते, त्यामुळे त्वचेचे आरोग्य आणि नैसर्गिक लवचिकता टिकून राहते.
साहित्य आणि कृती
आवळा लाडू बनवण्यासाठी आवळा, गूळ, तूप, सुक्या खोबऱ्याचा किस, वेलची पावडर, सुंठ पावडर आणि सुका मेवा लागतो. प्रथम आवळे पाण्याने स्वच्छ धुवून कोरडे करावेत. त्यानंतर ते किसणीने बारीक किसून घ्यावेत. कढईत किसलेला गूळ घालून मंद आचेवर पाक तयार करावा. तयार पाकात आवळ्याचा किस घालून मिसळावा. आवळा आणि गूळ एकजीव झाल्यानंतर मिश्रण घट्ट होऊ लागल्यावर त्यात वेलची पावडर, सुंठ पावडर, सुक्या खोबऱ्याचा किस आणि सुका मेवा घालून मिसळावे. शेवटी तूप घालून पुन्हा मिसळावे. मिश्रण हलके थंड झाल्यावर त्याचे लाडू वळावेत. अशा प्रकारे पौष्टिक आणि चविष्ट आवळ्याचे लाडू तयार होतात.
हिवाळ्यात नियमित आवळा लाडू आहारात समाविष्ट करता येतो. त्यामुळे शरीराला व्हिटॅमिन सी आणि इतर पोषक घटक मिळतात. घरच्या घरी सहज बनवता येणारा हा पदार्थ थंडीच्या दिवसांत आरोग्यासाठी उपयुक्त ठरू शकतो.
Leave a Reply