बदलापूरमध्ये तरुणाची निर्घृण हत्या करण्यात आल्याची घटना घडली. बदलापूर नजीकच्या वांगणी येथील कुडसावरे परिसरात धारदार शस्त्रांनी हल्ला करत तरुणाला संपवण्यात आले. भररस्त्यात तरुणावर कोयता आणि सुऱ्याने वार करण्यात आले. हल्ल्यानंतर आरोपींनी घटनास्थळावरून पळ काढला. या हल्ल्यात गंभीर जखमी झालेल्या तरुणाचा मृत्यू झाला. या घटनेमुळे बदलापूर हादरले आहे. पोलिस आरोपींचा शोध घेत आहेत.
मध्यरात्री मास्क लावून आलेल्या हल्लेखोरांचा हल्ला
मिळालेल्या माहितीनुसार, रात्री साडेअकरा वाजण्याच्या सुमारास चेहऱ्यावर मास्क लावून आलेल्या हल्लेखोरांनी अचानक गौतम जोशी यांच्यावर हल्ला केला. त्यांच्या चेहऱ्यावर, पाठीवर, पोटावर आणि शरीराच्या इतर भागांवर ८ ते ९ वार करण्यात आल्याची माहिती आहे. हल्ल्यानंतर आरोपी घटनास्थळावरून पसार झाले. या हल्ल्यात गंभीर जखमी झालेल्या गौतम जोशी यांचा रुग्णालयात उपचारादरम्यान मृत्यू झाला.
पोलिस तपास सुरू, हल्ल्यामागील कारण अस्पष्ट
घटनेची माहिती मिळताच कुळगांव ग्रामीण पोलिस ठाण्याच्या पथकाने घटनास्थळी धाव घेत पंचनामा केला. फॉरेन्सिक पथकानेही घटनास्थळाची पाहणी केली. पोलिसांनी या प्रकरणी हत्येचा गुन्हा दाखल करून तपास सुरू केला आहे. फरार हल्लेखोरांचा शोध घेतला जात आहे. या हल्ल्यामागील नेमके कारण अद्याप स्पष्ट झालेले नाही.
Leave a Reply