मायग्रेन म्हणजेच अर्धशिशीचा त्रास अनेकांना होतो. हा त्रास केवळ डोकेदुखीपुरता मर्यादित नसतो. त्याचा परिणाम माणसाच्या रोजच्या कामांवर, झोपेवर आणि जीवनमानावरही होतो. मायग्रेनचा त्रास सुरू झाल्यानंतर आराम मिळावा यासाठी अनेक जण घरगुती उपाय करतात. काही उपायांमुळे तात्पुरता आराम मिळू शकतो. पण हे उपाय खरोखर किती फायदेशीर आहेत, याबाबत डॉक्टरांनी माहिती दिली आहे.
फ्रेंच फ्राइज, शीतपेय आणि थंड पट्टी
मायग्रेनचा त्रास होत असताना काही जण फ्रेंच फ्राइज आणि शीतपेय घेतात. शीतपेयातील कॅफिनमुळे काही वेळासाठी आराम मिळू शकतो. त्याचप्रमाणे शरीरात पाण्याची कमतरता असल्यास फ्रेंच फ्राइजमधील मीठ काही प्रमाणात उपयोगी ठरू शकते. पण मायग्रेनवरील उपाय म्हणून वारंवार फास्ट फूड खाणं आरोग्यासाठी चांगलं नाही.
डोक्यावर बर्फाची थंड पट्टी ठेवल्याने आराम मिळू शकतो. मात्र पाय गरम पाण्यात ठेवल्याने मायग्रेन कमी होतो, याबाबत ठोस वैद्यकीय पुरावा उपलब्ध नाही.
बोटॉक्स, पाणी आणि शांत विश्रांती
वारंवार मायग्रेनचा त्रास होत असल्यास बोटॉक्स म्हणजेच बोटुलिनम टॉक्सिनचा वापर प्रतिबंधात्मक उपचार म्हणून प्रभावी ठरू शकतो. पण हा लगेच आराम देणारा उपाय नाही. त्यासाठी प्रशिक्षित वैद्यकीय तज्ज्ञांकडूनच उपचार घेणं आवश्यक आहे.
शरीरात पाण्याची कमतरता निर्माण झाल्यास डोकेदुखीचा त्रास वाढू शकतो. त्यामुळे पुरेसं पाणी पिणं महत्त्वाचं आहे. पण जास्त प्रमाणात पाणी प्यायल्याने मायग्रेन थांबत नाही. उलट अतिप्रमाणात पाणी पिणं हानिकारक ठरू शकतं.
थंडावा देणारी किंवा डोक्यावर हलका दाब देणारी मायग्रेन कॅप वापरल्याने काही प्रमाणात आराम मिळू शकतो. पण हा केवळ पूरक उपाय आहे. प्रकाश आणि मोठ्या आवाजामुळे मायग्रेनचा त्रास वाढू शकतो. अशावेळी शांत आणि अंधाऱ्या खोलीत विश्रांती घेतल्याने लक्षणं कमी होण्यास मदत मिळू शकते.
टीप: ही माहिती सर्वसाधारण माहितीसाठी आहे. कोणताही वैद्यकीय सल्ला घेण्यापूर्वी आपल्या डॉक्टरांचा सल्ला घेणे आवश्यक आहे.
Leave a Reply