नाशिक जिल्ह्यात थंडीची चाहूल आता चांगलीच जाणवू लागली आहे. पारा सातत्याने घसरत असून, रोजच या हंगामातील नीचांकी तापमानाची नोंद होत आहे. रविवारी निफाडमध्ये किमान तापमान ११ अंश सेल्सिअस नोंदवले गेले, तर नाशिक शहरात ते १२.६ अंश सेल्सिअस इतके राहिले. नागरिकांना थंडी जाणवू लागली आहे.
हवामान विभागाच्या दैनंदिन अहवालानुसार, राज्यातील मोठ्या शहरांमध्ये पुण्याचे किमान तापमान १२.१ अंश सेल्सिअस नोंदवले गेले असून, ते राज्यातील सर्वात कमी किमान तापमान ठरले आहे. त्याखालोखाल नाशिकचे किमान तापमान आहे. राज्यभरात तुरळक ठिकाणी किमान तापमान सरासरीपेक्षा लक्षणीयरीत्या खाली गेले आहे. हवामान कोरडे राहण्याची शक्यता असल्याने पुढील काही दिवसांत पारा आणखी घसरण्याची शक्यता वर्तवण्यात आली आहे.
दिवसा चटका, संध्याकाळी गारठा
गेल्या आठवड्याभरात किमान तापमानात जेमतेम दोन अंशांची घट झाली असली, तरी कमाल तापमानात मात्र मोठी वाढ झाली आहे. त्यामुळे दिवसा उन्हाचा चटका वाढत असून, सायंकाळनंतर गार वाऱ्यामुळे तापमानात मोठी घसरण होते आणि थंडीची तीव्रता अधिक जाणवते. रविवारी नाशिकचे किमान तापमान १२.६ अंश सेल्सिअस असले, तरी कमाल तापमान ३१.६ अंश सेल्सिअस नोंदवले गेले. किमान आणि कमाल तापमानातील ही मोठी तफावत सध्या ठळकपणे दिसत आहे.
पुढील दिवसांत पारा आणखी घसरण्याची शक्यता
हवामान कोरडे राहिल्यास पारा आणखी खाली जाण्याची शक्यता आहे. त्यामुळे सकाळी आणि रात्री थंडीचा जोर वाढत जाणार असून, नागरिकांना आरोग्याची काळजी घेण्याचे आवाहन केले जात आहे. विशेषतः लहान मुले आणि ज्येष्ठ नागरिकांनी सकाळच्या गारव्यात उबदार कपड्यांचा वापर करावा, असा सल्ला दिला जात आहे. जिल्ह्यात थंडीचा हा जोर पुढील काही दिवस कायम राहण्याची शक्यता आहे.
Leave a Reply