सातारा जिल्हा ग्रामपंचायत अधिकारी पतसंस्थेने आपल्या सर्व सभासदांसाठी एक महत्त्वाचा निर्णय घेतला आहे. पतसंस्थेच्या सर्व ७२३ सभासदांचा प्रत्येकी दहा लाख रुपयांचा अपघात विमा काढण्यात येणार आहे. या निर्णयामुळे जिल्ह्यातील शेकडो ग्रामपंचायत अधिकारी आणि त्यांच्या कुटुंबीयांना मोठा दिलासा मिळणार आहे.
ग्रामपंचायत अधिकारी आणि ग्रामसेवक गावपातळीवर अहोरात्र काम करत असतात. शासकीय कामकाज, दौरे, बैठका आणि विविध योजनांच्या अंमलबजावणीसाठी त्यांना सतत गावोगावी प्रवास करावा लागतो. अशा प्रवासात अपघाताचा धोका संभवतो. ही बाब लक्षात घेऊन पतसंस्थेच्या संचालक मंडळाने सर्व सभासदांचा अपघात विमा काढण्याचा निर्णय घेतला असून, या विम्याचा सर्व खर्च पतसंस्थेने उचलला आहे, अशी माहिती पतसंस्थेचे अध्यक्ष अभिजित चव्हाण यांनी दिली.
विम्याअंतर्गत कोणते संरक्षण मिळणार
या विम्याअंतर्गत अपघाती मृत्यू, कायमस्वरूपी अपंगत्व तसेच अपघातामुळे होणाऱ्या वैद्यकीय उपचारांच्या खर्चासाठी सभासद आणि त्यांच्या वारसांना आर्थिक संरक्षण मिळणार आहे. त्यामुळे सभासदांचे कुटुंब आर्थिकदृष्ट्या सुरक्षित राहणार आहे.
या निर्णयाचे सर्व सभासदांनी स्वागत केले असून, जिल्ह्यातील अधिकारी वर्गातून पतसंस्थेच्या संचालक मंडळाचे कौतुक होत आहे. कोरेगाव येथे झालेल्या कार्यक्रमाला ग्रामपंचायत अधिकारी संघटनेचे विभागीय सहसचिव रजनीकांत गायकवाड, जिल्हाध्यक्ष संतोष माळवे, सरचिटणीस संदीप सावंत यांच्यासह अनेक पदाधिकारी आणि कर्मचारी उपस्थित होते.
सभासदांच्या हितासाठी पुढील उपक्रम
अपघात विमा हा केवळ विमा नसून, सभासदांप्रति असलेली जबाबदारी असल्याचे अध्यक्ष अभिजित चव्हाण यांनी सांगितले. यापुढेही सभासदांच्या हितासाठी असे अनेक उपक्रम राबवण्यात येतील, असे त्यांनी नमूद केले.
Leave a Reply