गाढव हा प्रामाणिक आणि मेहनती प्राणी म्हणून ओळखला जातो. ओझे उचलण्याच्या कामात गाढवाचा मोठा वाटा राहिला आहे. तरीही गाढव हा कोणत्या देशाचा राष्ट्रीय प्राणी आहे, असा प्रश्न अनेकांना पडतो. या प्रश्नाचे उत्तर शोधताना एक गंमतीशीर माहिती समोर येते.
पाकिस्तानमध्ये गाढव, शेळी, गाय आणि म्हशींप्रमाणेच पाळले जातात. पाकिस्तान चीनला गाढवांची निर्यात करतो. तिथे विविध शक्तीवर्धक औषधांसाठी तसेच सौंदर्यप्रसाधनांसाठी गाढवांचा वापर केला जातो. मात्र, या दोन्ही देशांचा गाढव हा राष्ट्रीय प्राणी नाही. जगातील अनेक देशांचे सिंह, वाघ, घोडा किंवा मोर असे राष्ट्रीय प्राणी आहेत. काही राज्यांनाही स्वतःचे राष्ट्रीय पशू आणि पक्षी असतात.
बोनेरे बेटावर गाढवाला खास दर्जा
कॅरिबियन समुद्रातील बोनेरे या सुंदर बेटाने मात्र गाढवाला खास दर्जा दिला आहे. नैसर्गिक पर्यावरण आणि ऐतिहासिक पार्श्वभूमी लक्षात घेऊन स्थानिकांनी या प्राण्याला विशेष स्थान दिले आहे. या बेटावर गाढवांचा वापर वाहतूक आणि सामानाची ने-आण करण्यासाठी मोठ्या प्रमाणावर केला जात होता. आधुनिक वाहने आल्यानंतर गाढवांना जंगलात सोडण्यात आले. त्यामुळे त्यांची संख्या वाढली. त्यानंतर या प्राण्यांच्या संरक्षणासाठी विशेष मोहीम राबवण्यात आली. विशेष म्हणजे या बेटावर गाढवांसाठी जंगल सुरक्षित करण्यात आले असून, एक प्रकारे ते गाढवांसाठीचे अभयारण्य झाले आहे.
कॅटालोनियाचे अनौपचारिक प्रतीक
स्पेनमधील कॅटालोनिया या स्वायत्त प्रदेशात गाढवाला अनौपचारिक प्रतीक म्हणून मान्यता आहे. येथील कॅटलन जातीच्या गाढवाला या प्रदेशाचे अनौपचारिक प्रतीक मानले जाते. कॅटालोनिया हा स्पेनचा स्वायत्त प्रदेश आहे. गाढव हा तिथला राष्ट्रीय प्राणी नाही, पण एक प्रतीक म्हणून स्थानिकांनी गाढवांना ओळख दिली आहे. कॅटलन जातीची गाढवे अतिशय मेहनती आणि काटक स्वभावाची असतात. त्यांच्या मजबूत शरीरयष्टीसाठी ती ओळखली जातात. या गाढवांना या प्रदेशात स्वातंत्र्याचे प्रतीक मानले जाते. या प्रदेशात गाढवाच्या प्रामाणिकपणाचा आणि मेहनतीचा आदर केला जातो.
Leave a Reply