झोपेत घोणसाचा दंश; सांगलीतील महिलेचा मृत्यू

सांगली जिल्ह्यात एक हृदय पिळवटून टाकणारी घटना घडली आहे. घरात गाढ झोपेत असलेल्या पन्नास वर्षीय महिलेला विषारी सापाने दंश केला आणि उपचारासाठी नेत असतानाच तिचा मृत्यू झाला. वाळवा तालुक्यातील तांबवे गावात ही दुर्दैवी घटना घडली असून, संपूर्ण गावावर शोककळा पसरली आहे.

मृत महिलेचे नाव वंदना अनिल जाधव असे आहे. त्या तांबवे येथील प्रगतशील शेतकरी अनिल जाधव यांच्या पत्नी होत्या. वंदना जाधव या कासेगाव रस्त्यावरील आपल्या शेतातील घरात कुटुंबासह राहत होत्या. शुक्रवारी रात्री नेहमीप्रमाणे घरातील सर्व सदस्यांनी एकत्रित जेवण केले. त्यानंतर सर्वजण झोपण्यासाठी गेले. रात्री साधारण एक वाजण्याच्या सुमारास ही दुर्दैवी घटना घडली.

मध्यरात्री जाग आली आणि सर्पदंश लक्षात आला

वंदना जाधव गाढ झोपेत असताना घरात शिरलेल्या घोणस जातीच्या विषारी सापाने त्यांना दंश केला. अचानक झालेल्या तीव्र वेदनांमुळे त्यांना जाग आली. आपल्याला सापाने चावा घेतल्याचे लक्षात येताच त्यांनी तातडीने शेजारी झोपलेल्या पती अनिल जाधव आणि मुलगी अमरजा यांना उठवले. त्यांना घडलेला प्रकार सांगितल्यानंतर कुटुंबीयांची एकच धावपळ उडाली.

कराडला नेताना वाटेतच मृत्यू

वंदना यांना सर्पदंश झाल्याचे समजताच कुटुंबीयांनी वेळ न घालवता त्यांना पुढील उपचारासाठी कराड येथील रुग्णालयात नेण्याचा निर्णय घेतला. मात्र, घोणस जातीच्या सापाचे विष अत्यंत घातक असल्याने त्यांची प्रकृती झपाट्याने खालावत गेली. रुग्णालयात पोहोचण्यापूर्वीच वाटेत त्यांचा मृत्यू झाला. रात्री कुटुंबीयांसोबत आनंदाने जेवण करून झोपलेल्या वंदना जाधव यांचा अशा प्रकारे अचानक मृत्यू झाल्याने जाधव कुटुंबावर दुःखाचा डोंगर कोसळला आहे.

वंदना जाधव यांच्या पश्चात पती, मुलगा, मुलगी आणि नातवंडे असा परिवार आहे. या घटनेमुळे तांबवे गावासह परिसरात हळहळ व्यक्त केली जात आहे. रात्रीच्या वेळी घरात साप शिरण्याच्या घटना ग्रामीण भागात घडत असल्याने नागरिकांनी सावधगिरी बाळगण्याचे आवाहन या निमित्ताने होत आहे.