लो पॉवर मोड सतत सुरू ठेवणे योग्य की अयोग्य?

स्मार्टफोनची बॅटरी दिवसभर पुरावी, यासाठी अनेकजण फोनमध्ये लो पॉवर मोड किंवा बॅटरी सेव्हर सतत सुरू ठेवतात. बॅटरी वाचवण्याच्या या सवयीमागे चांगला हेतू असतो, पण त्याची किंमतही मोजावी लागते. बॅटरी जास्त काळ टिकते, हे खरे; मात्र त्याच वेळी फोनचा वेग मंदावतो आणि काही महत्त्वाची कामेही अडखळू लागतात.

बॅटरी वाचते, पण वेग कमी होतो

बॅटरी सेव्हर सुरू केल्यावर फोन वीज वाचवण्यासाठी आपली कामगिरी कमी करतो. त्यामुळे फोन पूर्वीसारखा वेगाने चालत नाही. १२० हर्ट्झचा गुळगुळीत स्क्रीन अनुभवही मंदावतो आणि स्क्रीनचा रिफ्रेश रेट कमी होतो. हॅप्टिक फीडबॅक, म्हणजेच स्पर्शाला मिळणारा कंपनाचा प्रतिसादही कमकुवत होतो. इतकेच नाही, तर ५जी इंटरनेटचाही वेग कमी होऊ शकतो.

महत्त्वाच्या सूचना मिळण्यास अडथळा

बॅटरी सेव्हरचा आणखी एक मोठा परिणाम म्हणजे नोटिफिकेशन्सवर होणारा परिणाम. काही महत्त्वाच्या सूचना वेळेवर मिळत नाहीत किंवा उशिरा मिळतात. त्यामुळे एखादा महत्त्वाचा संदेश किंवा सूचना चुकण्याची शक्यता वाढते. फोन वापरताना हा फरक लगेच लक्षात येतो.

हा मोड कधी वापरावा?

बॅटरी सेव्हरचे फायदे आणि तोटे दोन्ही लक्षात घेता, तो सतत सुरू ठेवण्याऐवजी गरजेनुसार वापरणे योग्य ठरते. बॅटरी कमी झाली असेल आणि चार्जर जवळ नसेल, तेव्हा हा मोड उपयुक्त ठरतो. मात्र रोजच्या वापरात तो कायमस्वरूपी सुरू ठेवला, तर फोनचा वेग, स्क्रीन आणि सूचना यांच्यावर होणारा परिणाम सहन करावा लागतो. त्यामुळे वापरण्यापूर्वी या मोडचे तांत्रिक सत्य समजून घेणे महत्त्वाचे आहे.