चारकोप-गोराईतील चाळींचा समूह पुनर्विकास

मुंबईच्या पश्चिम उपनगरातील चारकोप आणि गोराई येथील बैठ्या चाळींचा समूह पुनर्विकास करण्याचा निर्णय म्हाडाने घेतला आहे. या चाळींचा म्हाडा बांधकाम आणि विकास संस्थेच्या माध्यमातून पुनर्विकास केला जाणार असून, त्याबाबतचा प्रस्ताव आठवडाभरात राज्य सरकारकडे पाठवला जाणार आहे. येथे वास्तव्यास असलेल्या तब्बल ३२ हजार ४७६ रहिवाशांना याचा लाभ मिळणार आहे.

दोन्ही भागांत हजारो घरे

चारकोप येथे २१७ एकरांचा भूखंड असून, त्यावर बैठ्या चाळी आहेत. त्यामध्ये जवळपास ११ हजार ९६२ घरे आहेत. गोराई येथे १९४ एकरांच्या भूखंडावर २० हजार ५१४ घरे आहेत. या दोन्ही भूखंडांचा समूह पुनर्विकासाच्या माध्यमातून विकास केला जाणार आहे.

या पुनर्विकासाबाबतचा प्रस्ताव म्हाडाच्या विशेष प्रकल्प कक्षाने तयार केला आहे. म्हाडाचे उपाध्यक्ष तथा मुख्य कार्यकारी अधिकारी संजीव जयस्वाल यांच्या मंजुरीनंतर हा प्रस्ताव आठवडाभरात गृहनिर्माण विभागाकडे पाठवला जाणार असल्याची माहिती म्हाडाच्या एका वरिष्ठ अधिकाऱ्याने दिली.

मंजुरीनंतर पुढील प्रक्रिया

प्रस्तावाची सखोल तपासणी करून राज्य सरकार त्याबाबत शासन निर्णय जारी करेल. त्यानंतर सखोल आराखडा तयार करणे, उच्चाधिकार समितीची मंजुरी घेणे आणि त्यानंतर बांधकाम आणि विकास संस्थेच्या नियुक्तीसाठी निविदा काढणे हे सोपस्कार पार पडणार असल्याचे अधिकाऱ्याने स्पष्ट केले. या प्रस्तावाला सरकारने मंजुरी दिल्यानंतर पुनर्विकास प्रकल्पाबाबतचा विस्तृत प्रकल्प अहवाल तयार करून विकसकाच्या नेमणुकीची प्रक्रिया सुरू केली जाणार आहे.