लातूरमध्ये प्रकाशनगर येथील ज्ञानप्रकाश ग्रंथालयाच्या वतीने लेखक भारत सातपुते यांचा सत्कार करण्यात आला. सातपुते यांनी ६५ हून अधिक पुस्तकांची निर्मिती केली असून, त्यांना १०० हून अधिक पुरस्कार मिळाले आहेत. या सत्कार समारंभात सांगोला येथील संत साहित्याचे अभ्यासक आणि कीर्तनकार ज्ञानेश्वर बंडगर महाराज यांनी समतेसाठी क्रांतीची गरज असल्याचे प्रतिपादन केले.
जातीपातीच्या पलीकडे जाऊन समतेसाठी क्रांती होण्याची गरज आहे, असे बंडगर महाराज म्हणाले. पूजाअर्चा, मंत्र-तंत्र आणि मूर्तीपूजेमुळे संतांच्या वैचारिकतेकडे दुर्लक्ष होत असल्याचे त्यांनी सांगितले. सामाजिक परिवर्तनाची नांदी खऱ्या अर्थाने पंढरीत सुरू झाली असली, तरी ही पताका घरोघर पोहोचविण्याचे कार्य कीर्तन प्रवचनकारांकडून होणे गरजेचे आहे, असेही त्यांनी नमूद केले.
सातपुते यांच्या साहित्यात परिवर्तनाची ओढ
कधी विनोदाने तर कधी गांभीर्याने सातपुते यांच्या साहित्यात परिवर्तनाची ओढ दिसते आणि ती वाखाणण्याजोगी आहे, असे बंडगर महाराज म्हणाले. इतिहासतज्ज्ञ प्राचार्य डॉ. सोमनाथ रोडे यांनी गेल्या ३५ वर्षांपासून सातपुते यांच्या साहित्यिक, सामाजिक आणि शैक्षणिक कार्याचे आपण साक्षीदार असल्याचे सांगितले. त्यांच्या वक्तृत्वाने आणि कवितेने रसिकांच्या मनात घर केले असून स्पष्टवक्तेपणा त्यांनी कधी सोडला नाही आणि आपल्या लेखणीशी ते नेहमीच प्रामाणिक राहिले, असे डॉ. रोडे म्हणाले.
मान्यवरांची उपस्थिती
या कार्यक्रमाला महाराष्ट्र अंधश्रद्धा निर्मूलन समितीचे अध्यक्ष माधव बावगे, ज्येष्ठ साहित्यिक फ. म. शहाजिंदे, ग्रंथपाल मंगल बावगे, सतीश नरहरे, यू. के. गायकवाड, विवेक बावगे आणि माधुरी बावगे आदी उपस्थित होते. माधव बावगे आणि रुक्साना मुल्ला यांनी प्रास्ताविक केले, तर अब्दुल गालिब शेख यांनी सूत्रसंचालन केले. कवी शंकर झुल्फे यांनी आभार मानले.
Leave a Reply