वयाच्या अवघ्या १५ वर्षे आणि २३२ दिवसांत बिहार संघाचे नेतृत्व करत वैभव सूर्यवंशीने जागतिक क्रिकेटमध्ये नवा इतिहास रचला आहे. पुरुष टी-२० क्रिकेटमध्ये कर्णधारपद भूषवणारा तो जगातील सर्वात तरुण खेळाडू ठरला आहे. फलंदाजीसोबतच नेतृत्वगुणांची छाप पाडणारा हा युवा खेळाडू भारतीय क्रिकेटचे नवे आशास्थान मानला जात आहे.
सौराष्ट्रविरुद्धच्या सामन्यात नेतृत्वाची जबाबदारी
सैयद मुश्ताक अली टी-२० स्पर्धेत वैभव बिहार संघाचे नेतृत्व करत आहे. सौराष्ट्रविरुद्धच्या सामन्यात त्याने नाणेफेक जिंकून प्रथम फलंदाजी करण्याचा निर्णय घेतला. फलंदाजीतही त्याने चमक दाखवली. सौराष्ट्रविरुद्ध वैभवने १२ चेंडूंमध्ये १८ धावा केल्या. १५० च्या स्ट्राइक रेटने खेळताना त्याने दोन चौकार आणि एक षटकार लगावला.
क्रोएशियाच्या विक्रमाला मागे टाकलं
वैभवने क्रोएशियाच्या जॅक वुकुसिकचा विक्रम मोडला. वुकुसिकने वयाच्या १७ वर्षे आणि ३११ दिवसांत टी-२० आंतरराष्ट्रीय क्रिकेटमध्ये आपल्या देशाचे नेतृत्व केले होते. वैभवने त्यापेक्षा तब्बल दोन वर्षांहून अधिक कमी वयात हा टप्पा गाठला आहे.
कमी वयात अनेक विक्रम नावावर
वैभवने यापूर्वी सैयद मुश्ताक अली ट्रॉफीमध्ये सर्वात कमी वयात शतक झळकावण्याचा विक्रम केला आहे. तसेच आयपीएल २०२५ मध्ये गुजरात टायटन्सविरुद्ध अवघ्या ३५ चेंडूंमध्ये शतक ठोकून त्याने इतिहास घडवला होता. इतक्या कमी वयात सलग विक्रम रचणारा वैभव भारतीय क्रिकेटच्या भविष्यासाठी मोठी आशा मानला जात आहे.
स्रोत: मूळ बातमी
Leave a Reply