अंडर-१९ आशिया कप स्पर्धेच्या अंतिम लढतीत भारत आणि पाकिस्तान हे दोन्ही पारंपरिक प्रतिस्पर्धी पुन्हा एकदा आमनेसामने आले आहेत. आजच्या या महत्त्वाच्या सामन्यात पाकिस्तानने नाणेफेक जिंकून आधी फलंदाजी करण्याचा निर्णय घेतला आणि त्यांच्या फलंदाजांनी हा निर्णय सुरुवातीला योग्य ठरवला.
सामन्याच्या ३० षटकांपर्यंत पाकिस्तानने दोन बाद २०० धावांचा टप्पा ओलांडला होता. सलामीच्या जोडीने ६२ धावांची भागीदारी रचून संघाला भक्कम सुरुवात करून दिली. मात्र त्यानंतर भारताच्या गोलंदाजांनी पुनरागमन करत दोन महत्त्वाचे बळी मिळवले.
कादीरची वादळी खेळी, उस्मान खानची संयमी फलंदाजी
अब्दुल कादीर हा पाकिस्तानच्या डावातील सर्वात धोकादायक फलंदाज ठरला. त्याने अवघ्या ५४ चेंडूंमध्ये ८० धावा फटकावल्या. त्याच्या खेळीत तीन चौकार आणि तब्बल आठ षटकारांचा समावेश होता. अखेर विनीतच्या गोलंदाजीवर अर्जुन राजपूतने त्याचा झेल घेत भारताला मोठे यश मिळवून दिले. त्याचबरोबर हयान खान २१ धावांवर बाद झाला. दुसऱ्या बाजूने सलामीवीर उस्मान खान मात्र अजूनही खेळपट्टीवर टिकून आहे. तो नव्वदीच्या जवळ पोहोचला असून त्याने आतापर्यंत दहा चौकार आणि दोन षटकार लगावले आहेत.
साखळी सामन्यातील पराभवाचा बदला घेण्याची संधी
या स्पर्धेच्या साखळी फेरीत झालेल्या रोमांचक सामन्यात पाकिस्तानने भारताचा तीन विकेट राखून पराभव केला होता. त्या सामन्यात भारताने २०८ धावा केल्या होत्या आणि पाकिस्तानने सात विकेट गमावून ते लक्ष्य गाठले होते. भारताकडून अर्जुन राजपूतने सर्वाधिक १०७ धावा केल्या होत्या, तर काव्य पटेलने २३ आणि आर्यवीर सेहवागने २२ धावांचे योगदान दिले होते.
त्या पराभवानंतर मात्र भारतीय संघाने जोरदार पुनरागमन केले. यूएई, नेपाळ आणि अफगाणिस्तान या संघांवर विजय मिळवत भारताने अंतिम फेरीचे तिकीट मिळवले. त्यामुळे आजच्या अंतिम सामन्यात भारताकडे साखळी फेरीतील पराभवाचा वचपा काढण्याची उत्तम संधी आहे. आतापर्यंत दोन्ही संघांमध्ये ३१ युवा एकदिवसीय सामने झाले असून त्यात भारताने १७ सामने जिंकले आहेत, तर पाकिस्तान १३ वेळा यशस्वी ठरला आहे. एक सामना बरोबरीत सुटला होता.
स्रोत: मूळ बातमी
Leave a Reply