पंतप्रधान किसान सन्मान निधी योजनेत शेतकऱ्यांना वर्षाला ६,००० रुपयांची आर्थिक मदत मिळते. वर्षातून तीन हप्ते थेट बँक खात्यात जमा होतात, प्रत्येक हप्ता २,००० रुपयांचा असतो. आतापर्यंत या योजनेचे २४ हप्ते शेतकऱ्यांच्या खात्यात जमा झाले आहेत. मात्र काही शेतकऱ्यांच्या खात्यात ही रक्कम जमा झालेली नाही. अशा वेळी संयुक्त कुटुंबात राहणाऱ्या शेतकऱ्यांच्या मनात एक प्रश्न निर्माण होतो — कुटुंबात चार भाऊ असतील तर हा हप्ता कुणाला मिळेल?
२५ वा हप्ता कधी जमा होणार?
पंतप्रधान किसान योजनेचा २४ वा हप्ता ३० ऑक्टोबर २०२६ रोजी वितरित करण्यात आला. योजनेतील हप्ते वितरित करण्याची पद्धत पाहता, दर चार महिन्यांनी एक हप्ता जमा केला जातो. त्यानुसार २५ वा हप्ता फेब्रुवारी २०२७ मध्ये शेतकऱ्यांच्या बँक खात्यात जमा होईल. याबाबतची अधिकृत तारीख अद्याप जाहीर झालेली नाही.
संयुक्त कुटुंबात कोणाला फायदा?
संयुक्त कुटुंबात चार किंवा त्यापेक्षा अधिक भाऊ असतील तर हप्ता कुणाला मिळेल, हा प्रश्न अनेकांना पडतो. चार भाऊ एकाच घरात राहत असतील आणि कुटुंब एकत्रित असेल तर सहा हजार रुपयांचा वार्षिक हप्ता कुणाला मिळेल? एका भावाला फायदा होईल की चारही भावांना? हे गणित कुटुंबाचा दर्जा आणि शेतजमिनीचा मालक कोण आहे, यावर अवलंबून असते.
योजनेच्या नियमानुसार, शेतकरी कुटुंबात पती, पत्नी आणि अल्पवयीन मुलांचा समावेश होतो. केवळ एकाच घरात राहतात आणि आडनाव सारखे आहे, म्हणून सर्व भाऊ शेतकरी कुटुंब म्हणून ग्राह्य धरले जात नाहीत. जर प्रत्येक भावाच्या नावावर लागवडीयोग्य जमीन असेल तर प्रत्येकाला या योजनेचा लाभ घेता येतो. अशा प्रकारे चारही भाऊ या योजनेसाठी पात्र ठरू शकतात आणि प्रत्येकाला ६,००० रुपयांचा वार्षिक लाभ मिळू शकतो. म्हणजेच जमिनीची मालकी वेगळी असेल तर एकाच कुटुंबात चार भावांना एकत्रित २४,००० रुपयांचा लाभ मिळेल.
स्रोत: मूळ बातमी
Leave a Reply