बीडमध्ये भाषणाआधीच माईक हिसकावला; खासदारांना पाण्यावरून जाब

बीड जिल्ह्यातील गेवराई तालुक्यातील शिंगरवाडी येथील मंदिर परिसरात आयोजित केलेल्या बैठकीत अचानक गोंधळ उडाला. खासदार बजरंग सोनवणे भाषणासाठी उभे राहण्यापूर्वीच गावातील एका तरुणाने त्यांच्या हातातील माईक घेतला आणि पाण्याच्या प्रश्नावर थेट जाब विचारला. या घटनेमुळे काही काळ बैठकीत गोंधळाचे वातावरण निर्माण झाले.

जायकवाडी प्रकल्पातून गेवराई तालुक्यातील वीस गावांसाठी स्वतंत्र कालवा निर्माण करावा, या मागणीसाठी आंदोलनाची हाक देण्यात आली आहे. याच आंदोलनाच्या पार्श्वभूमीवर ही बैठक आयोजित करण्यात आली होती. बैठकीला बीडचे खासदार बजरंग सोनवणे उपस्थित होते.

पाण्यासाठी लढा उभारा, तरच श्रेय देऊ

भाषण सुरू होण्याआधीच मनीष शेळके या तरुणाने माईक हातात घेतला. बीडमध्ये रेल्वे आणण्याचे श्रेय अनेकजण घेतात, आता पाण्यासाठी लढा उभारा; आम्ही लोकांना खरंच सांगू की खासदारांनी पाणी आणून दिलं, असे तो म्हणाला. पाण्याच्या प्रश्नासाठी शंभर वेळा फोन लावला, तुम्ही इथे आलात तर आमचा प्रश्न सोडवा, अशी मागणी त्याने केली.

रस्त्यांतील खड्ड्यांवरही सवाल

विकासकामांवरूनही तरुणाने जाब विचारला. बजरंग बप्पा, आम्ही तुम्हाला मतदान केलं आहे; आमच्या गावच्या रस्त्यांमध्ये गुडघ्या इतके खड्डे आहेत, आमचे प्रश्न आम्ही मांडायचे कुणापुढे, असा सवाल त्याने भर कार्यक्रमात उपस्थित केला. गेवराईचे आमदार तर विसरूनच गेले आहेत की ते गेवराईचे आमदार आहेत की बीडचे, असेही तो म्हणाला.

रब्बी पिकांना पाण्याची आशा

दरम्यान, मराठवाड्यातील अनेक भागांत पावसाने पाठ फिरवली असताना जायकवाडी प्रकल्पातून डाव्या आणि उजव्या कालव्यात पाण्याचे पहिले आवर्तन सोडण्यात आले आहे. त्यामुळे हजारो हेक्टरवरील रब्बी हंगामातील पिकांना सिंचनासाठी पाणी मिळण्यास मदत होणार आहे. जनावरांच्या चारा-पाण्याचा प्रश्नही काही प्रमाणात सुटण्याची आशा निर्माण झाली आहे. जायकवाडीतून सोडलेले पाणी परभणी जिल्ह्यात दाखल झाले आहे.

स्रोत: मूळ बातमी