मुंबईतील रेल्वे स्थानकांवर छठपूजेनिमित्त भल्या पहाटेपासून ध्वनिक्षेपकावरून भोजपुरी गाणी वाजवण्यात आल्याने वाद निर्माण झाला आहे. मध्य, पश्चिम आणि हार्बर मार्गावरील छत्रपती शिवाजी महाराज टर्मिनस, वडाळा, नेरुळ, सानपाडा, आंबिवली आणि अंधेरी यांसह अनेक स्थानकांवर ही गाणी वाजवण्यात आली. या कृतीवर मनसे आणि उद्धव ठाकरे यांच्या शिवसेनेने तीव्र नाराजी व्यक्त केली आहे. छत्रपती शिवाजी महाराज जयंती, डॉ. बाबासाहेब आंबेडकर जयंती किंवा गणेशोत्सवाच्या वेळी स्थानकांवर मराठी गाणी कधीच वाजवली गेली नाहीत, मग छठपूजेसाठीच असा निर्णय का घेण्यात आला, असा सवाल रेल्वे प्रशासनाला विचारण्यात आला आहे. ही गाणी तात्काळ बंद करण्याची मागणीही करण्यात आली आहे.
वारिस पठाण यांचे वक्तव्य काय?
या वादात आता ऑल इंडिया मजलिस-ए-इत्तेहादुल मुस्लिमीननेही उडी घेतली आहे. पक्षाचे नेते वारिस पठाण यांनी या प्रकरणावर मोठे वक्तव्य केले आहे. छठपूजा हा हिंदू बांधवांचा मोठा सण असून तो उत्साहात साजरा करावा, असे ते म्हणाले. प्रत्येकाला आपले सण साजरे करण्याचा अधिकार असल्याचे मतही त्यांनी व्यक्त केले. मात्र रेल्वे स्थानकावर नमाज पठण केल्यास काय होईल, असा सवाल त्यांनी उपस्थित केला. संविधान समानतेचा अधिकार देते आणि नियम व कायदे सर्वांसाठी समान असावेत, अशी मागणी त्यांनी केली. मी रेल्वे स्थानकावर जाऊन नमाज पठण केले तर मोठा गदारोळ होईल, असे वक्तव्य पठाण यांनी केले आहे.
रेल्वे प्रशासनाचे म्हणणे काय?
रेल्वे प्रशासनाने या गाण्यांबाबत स्पष्टीकरण दिले आहे. अत्यावश्यक उद्घोषणेच्या वेळी ही गाणी वाजवली जात नसून फावल्या वेळेतच ती वाजवण्यात येत असल्याचा दावा प्रशासनाने केला आहे. मात्र मुंबईकरांमध्ये या प्रकाराबद्दल नाराजीचा सूर असल्याचे दिसून येत आहे. या वादावर पुढे काय भूमिका घेतली जाते, याकडे सर्वांचे लक्ष लागले आहे.
स्रोत: मूळ बातमी
Leave a Reply