बीड जिल्ह्यातील गेवराई तालुक्यातील भारवंटा गावात जनसंपर्क दौऱ्यादरम्यान एका तरुणाने खासदार बजरंग सोनवणे यांना थेट धारेवर धरले. निवडणुकीत मते मागायला येता, मग जिंकल्यावर आम्हाला वाऱ्यावर का सोडता? शंभर वेळा फोन करूनही तुम्ही एकदाही माझा फोन का उचलला नाही? असे रोकडे सवाल करत तरुणाने गावाच्या विकासाच्या मुद्द्यावरून आणि रखडलेल्या रस्त्यावरून खासदारांना आव्हान दिले. या घटनेचा व्हिडिओ सध्या व्हायरल होत आहे.
गावात १०५० मते, तरी विकास रखडला
व्हायरल होत असलेल्या व्हिडिओमध्ये हा तरुण अतिशय आक्रमक पवित्र्यात खासदारांना जाब विचारताना दिसत आहे. भारवंटा गावात एकूण १०५० मतदान असून त्यापैकी तब्बल १००५ मते दिली गेली, तरीही गावाचा विकास का रखडला, असा थेट सवाल त्याने केला. निवडणुका संपल्यानंतर नेतेमंडळी साधी विचारपूसही करत नाहीत, याबद्दल त्याने तीव्र संताप व्यक्त केला.
गुडघ्याएवढे खड्डे; पाण्याचीही मागणी
गावातील रस्त्यांच्या दयनीय अवस्थेवर बोलताना तरुणाचा पारा आणखीनच चढला. गावातील मुख्य रस्त्यांवर गुडघ्याएवढे खड्डे पडले आहेत. गावकऱ्यांना रोज नरकयातना सहन कराव्या लागतात, असे त्याने सांगितले. तुम्ही एसी गाडीतून फिरता, पण एकदा आमच्या गावाच्या रस्त्यावरून फेरफटका मारून दाखवा, म्हणजे आमचे काय हाल होतात ते तुम्हाला समजेल, अशा शब्दांत त्याने प्रशासनाला आणि खासदारांना आव्हान दिले. किमान या दुष्काळात तरी आमच्या पाण्याची सोय करा, अशी आर्त आणि संतप्त हाकही त्याने दिली.
स्रोत: मूळ बातमी
Leave a Reply