सटाणा येथील सार्वजनिक बांधकाम विभागाच्या कार्यालयात अधिकारी-कर्मचारी नेहमीच अनुपस्थित राहणे, रस्त्यांची झालेली दुरवस्था आणि विकासकामांचे प्रलंबित प्रश्न यांकडे प्रशासनाचे लक्ष वेधण्यासाठी राष्ट्रवादी काँग्रेसच्या वतीने शुक्रवारी (ता. १३) अनोख्या गांधीगिरी आंदोलनाद्वारे जोरदार निषेध नोंदविण्यात आला.
कार्यालयात केवळ दोन कर्मचारी
राष्ट्रवादी काँग्रेस पक्षाचे पदाधिकारी व कार्यकर्ते निवेदन देण्यासाठी कार्यालयात पोहोचले असता, तिथे केवळ दोन चतुर्थश्रेणी कर्मचारी उपस्थित असल्याचे आणि विभागांतर्गत अन्य कार्यालयांना कुलूप असल्याचे निदर्शनास आले. या प्रकारामुळे संतप्त झालेल्या कार्यकर्त्यांनी उपस्थित कर्मचाऱ्यांना दिवाळीनिमित्त फराळाचे वाटप करत कार्यालयाच्या प्रवेशद्वारावरच आंदोलन केले. त्यानंतर सटाणा-मालेगाव रस्त्यावरील रावळगाव फाट्याजवळ रस्त्यावर पडलेल्या खड्ड्यांतील उखडलेल्या दगडांना पुष्पहार अर्पण करून सार्वजनिक बांधकाम विभागाच्या ढिसाळ कारभाराचा जाहीर निषेध केला. तालुकाध्यक्ष राजेंद्र सोनवणे यांच्या नेतृत्वाखाली झालेल्या या आंदोलनानंतर विभागाच्या मुख्य अभियंत्यांना विविध मागण्यांचे सविस्तर निवेदन पाठविण्यात आले आहे.
प्रमुख मागण्या काय?
बागलाण तालुक्यातील बहुतांश रस्त्यांची अत्यंत दुरवस्था झाली असून, साक्री-शिर्डी राष्ट्रीय महामार्गासह विविध राज्यमार्गांच्या कामांदरम्यान करण्यात आलेल्या अंदाधुंद वृक्षतोडीच्या बदल्यात पर्यायी वृक्षलागवड नेमकी कुठे आणि किती प्रमाणात करण्यात आली, याची सार्वजनिक माहिती देण्याची मागणी निवेदनात करण्यात आली आहे. प्रत्यक्षात कागदावर दाखवलेली नवीन वृक्षलागवड कुठेही जमिनीवर दिसत नसल्याचा गंभीर आक्षेप यावेळी नोंदविण्यात आला. तालुक्यात ठिकठिकाणी अनावश्यक गतिरोधक तातडीने हटविण्यात यावेत, सार्वजनिक बांधकाम विभागातील ऑनलाइन निविदा प्रक्रियेत पारदर्शकता आणावी, कोट्यवधी रुपयांच्या शासकीय निधीचा अपव्यय टाळण्यासाठी कामांची गुणवत्ता व देखरेख यंत्रणेत तातडीने सुधारणा करावी आणि अधिकाऱ्यांना कार्यालयात उपस्थित राहणे बंधनकारक करावे, अशा प्रमुख मागण्या निवेदनात मांडण्यात आल्या आहेत.
स्रोत: मूळ बातमी
Leave a Reply