धाराशिव जिल्ह्यातील डायलिसिस रुग्णांसाठी दिलासादायक बातमी आहे. मुरूम, लोहारा, सास्तूर आणि वाशी येथील डायलिसिस केंद्रे आरोग्य विभागाने पुन्हा सुरू केली आहेत. त्यामुळे नियमित डायलिसिसवर अवलंबून असलेल्या ४४ गरीब आणि गरजू रुग्णांना मोठा दिलासा मिळाला आहे.
दोन वर्षांपासून बिले थकीत
साहित्य पुरवठादाराची दोन वर्षांपासूनची बिले थकीत असल्याने ही केंद्रे बंद पडली होती. मुरूम ग्रामीण रुग्णालयातील महा डायलिसिस केंद्राची सेवा ११ नोव्हेंबरपासून बंद करण्यात आली होती. मुरूम येथील १०, लोहारा येथील ८, सास्तूर येथील १६ आणि वाशी येथील १० अशा एकूण ४४ रुग्णांचे उपचार थकीत बिलांमुळे बंद पडले होते. या रुग्णांना उपचारासाठी तुळजापूर अथवा धाराशिव येथे दोन तासांचा प्रवास करावा लागण्याची वेळ आली होती, त्यामुळे नातेवाईकांची गैरसोय होण्याची शक्यता होती.
आंदोलनाच्या इशाऱ्यानंतर हालचाली
या प्रश्नावर जिल्हा काँग्रेस सचिव सिद्धलिंग अप्पा हिरेमठ यांच्या नेतृत्वाखाली काँग्रेसने मुरूम ग्रामीण रुग्णालयाचे वैद्यकीय अधीक्षक महेश अर्दाळे यांना निवेदन देऊन डायलिसिस केंद्र तातडीने सुरू करण्याची मागणी केली होती. मागणीवर विचार न केल्यास आंदोलनाचा इशाराही देण्यात आला होता. या इशाऱ्यानंतर जिल्हा यंत्रणा हालली आणि आरोग्य विभागाने तातडीने हालचाली करत ही केंद्रे पुन्हा सुरू केली. रुग्णांना आता पुन्हा नियमित उपचार घेता येणार आहेत.
स्रोत: मूळ बातमी
Leave a Reply