मुंबईतील सार्वजनिक वाहतूक अधिक सक्षम करण्यासाठी आणि पर्यावरणपूरक प्रवासाला चालना देण्यासाठी बेस्टच्या ताफ्यात तब्बल दीड हजार नवीन वातानुकूलित इलेक्ट्रिक मिडी बस दाखल होणार आहेत.
केंद्र सरकारच्या ‘पीएम ई-ड्राइव्ह’ योजनेअंतर्गत या बस भाडेतत्त्वावर घेण्यासाठी बेस्टने करार केला आहे. त्यामुळे ताफ्यात वाढ होण्याबरोबरच प्रवाशांना अधिक आरामदायी आणि विश्वासार्ह प्रवासाची सुविधा मिळणार आहे.
मेट्रो स्थानकांपर्यंत पोहोच सोपी होणार
मेट्रो मार्गांवरील स्थानके तसेच भविष्यात सुरू होणाऱ्या मेट्रो स्थानकांपर्यंत प्रवाशांना शेवटच्या टप्प्याची जोडणी देण्यासाठी या बस वापरण्यात येणार आहेत. अरुंद आणि गर्दीच्या रस्त्यांवर या मिडी बस धावू शकणार आहेत.
मुंबई विद्युत वाहन ऑपरेशन प्रा. लि. यांच्याकडून १,०५० बस, तर साईग्रीन इव्हीएम प्रा. लि. यांच्याकडून ४५० बस उपलब्ध करून देण्यात येणार आहेत. या बस नऊ मीटर लांबीच्या असून पूर्णपणे वातानुकूलित असतील.
बसमधील सुविधा आणि वेळापत्रक
नवीन बसमध्ये ४०० मिमी उंचीचा ‘अल्ट्रा लो’ प्रवेशद्वार आणि दिव्यांग प्रवाशांसाठी स्वयंचलित रॅम्पची सुविधा असेल. प्रत्येक बसमध्ये २८ प्रवाशांसाठी आसनव्यवस्था असून, दिव्यांग प्रवाशांच्या व्हीलचेअरसाठी स्वतंत्र जागा आहे.
एका चार्जमध्ये किमान २०० किलोमीटर धावण्याची क्षमता, छतावर आणि मागील बाजूस मॉड्युलर बॅटरी, पुढील व मागील बाजूस पूर्ण एअर सस्पेन्शन अशी व्यवस्था आहे. आगीचा शोध व प्रतिबंध यंत्रणा, सीसीटीव्ही, थेट जीपीएस मागोवा आणि प्रत्येक आसनाजवळ जलद यूएसबी चार्जिंग सुविधा यात असेल.
बारा वर्षांच्या कराराअंतर्गत प्रत्येक बस वर्षाला ६४ हजार किमी धावेल, असे निश्चित करण्यात आले आहे. या दीड हजार बसांसाठी आगार आणि बसमार्ग निश्चित करण्यात येणार असून, बसवरील जाहिरातींतून मिळणारे उत्पन्नही बेस्टला मिळेल.
बेस्टच्या ताफ्यात मार्च २०२७ पर्यंत २२५ बसगाड्या आणि उर्वरित बसगाड्यांचा समावेश मार्च २०२८ पर्यंत टप्प्याटप्याने केला जाणार आहे.
स्रोत: मूळ बातमी
Leave a Reply