रत्नागिरी आणि कोकणवासीयांसाठी प्रवासाच्या दृष्टीने महत्त्वाची बातमी समोर आली आहे. रत्नागिरी विमानतळ जानेवारीच्या पहिल्या आठवड्यापर्यंत सुरू होण्याची शक्यता असून, टर्मिनल इमारत सज्ज झाली आहे.
पालकमंत्री आणि उद्योगमंत्री उदय सामंत यांनी १२ नोव्हेंबर रोजी गुरुवारी सायंकाळी रत्नागिरीत आयोजित पत्रकार परिषदेत या घोषणा केल्या. यावेळी रत्नसिंधू योजनेचे उपाध्यक्ष डॉ. विनय नातू आणि जिल्हाधिकारी मनुज जिंदाल उपस्थित होते.
दोन पंचतारांकित हॉटेल्स, सहाशे ते सातशे रोजगार
रत्नागिरीत दोन पंचतारांकित हॉटेल्स उभी राहत आहेत. एक एक्सप्रेस इन आणि दुसरे महिंद्रा क्लब अशी ही दोन हॉटेल्स असून, त्यांच्या माध्यमातून सहाशे ते सातशे जणांना रोजगार मिळणार आहे.
या दोन्ही हॉटेल्सना टाटाच्या स्किल सेंटरशी जोडण्याच्या सूचना देण्यात आल्या आहेत. स्किल सेंटरमधून विविध अभ्यासक्रम पूर्ण करून बाहेर पडलेल्या तरुणांना या हॉटेल्समध्ये रोजगार देण्याचा निर्णय हॉटेल व्यवस्थापनाने घेतला आहे.
महिंद्रा क्लब हॉटेलचे काम ९० टक्के पूर्ण झाले असून, चंपक मैदानावर एक्सप्रेस इन हॉटेल उभे राहत आहे.
चिपीच्या तुलनेत रत्नागिरी विमानतळ सुसज्ज
सिंधुदुर्गातील चिपी विमानतळाची टर्मिनल इमारत आठ वर्षांपूर्वी पूर्ण झाली होती. रत्नागिरी विमानतळाची टर्मिनल इमारत दोन वर्षांत पूर्ण करण्यात आली. चिपीच्या तुलनेत रत्नागिरी विमानतळ जिल्हाधिकारी कार्यालयापासून केवळ दोन किलोमीटर अंतरावर आहे.
दरम्यान, कोकणात सध्या दुष्काळाची परिस्थिती असून, नुकसान भरपाईसाठी पंचनामे करण्यात आले आहेत. शासनाकडून मदत देण्याचे काम सुरू आहे. रत्नागिरी नगरपरिषदेच्या कामाची दखल राष्ट्रीय स्तरावर घेण्यात आल्याबद्दल सामंत यांनी समाधान व्यक्त केले.
घनकचरा प्रकल्पासाठी मात्र जिल्हा मागे राहिल्याची खंत त्यांनी व्यक्त केली. या प्रकल्पाची निविदा निघाली आहे. ठाण्यात केल्याप्रमाणे रत्नागिरीत १५ जणांचे आपत्कालीन पथक तयार करण्याचा निर्णय घेण्यात आला आहे. जिल्ह्यातील पाचही डायलिसिस केंद्रे बंद होऊ दिली जाणार नाहीत, अशी ग्वाहीही त्यांनी दिली.
स्रोत: मूळ बातमी
Leave a Reply