तुळशी विवाहानंतर लग्नसराई; नोव्हेंबरमध्ये फक्त ४ शुभ मुहूर्त

हिंदू धर्मात विवाह हा अत्यंत पवित्र संस्कार मानला जातो. त्यामुळे लग्नाची तारीख ठरवताना पंचांगानुसार शुभ मुहूर्त पाहण्याला विशेष महत्त्व दिले जाते. दरवर्षी चातुर्मासात विवाहासह अनेक शुभ कार्ये केली जात नाहीत. मात्र देवउठनी एकादशी आणि तुळशी विवाहानंतर चातुर्मासाची समाप्ती होत असल्याने पुन्हा एकदा लग्नसराईला सुरुवात होते.

२० नोव्हेंबर २०२६ रोजी देवउठनी एकादशीला चातुर्मास संपणार असून, त्यानंतर विवाहासह इतर मांगलिक कार्यांना सुरुवात होईल. पंचांगानुसार २०२६ मध्ये २० नोव्हेंबर रोजी शुक्रवारच्या दिवशी देवउठनी एकादशी आहे. या दिवशी भगवान विष्णू चार महिन्यांच्या योगनिद्रेतून जागे होतात, अशी धार्मिक मान्यता आहे. यासोबतच चातुर्मास संपतो आणि विवाह, गृहप्रवेश यांसारख्या शुभ कार्यांना पुन्हा सुरुवात होते. विशेष म्हणजे नोव्हेंबर महिन्यात लग्नासाठी केवळ चार शुभ मुहूर्त उपलब्ध आहेत.

नोव्हेंबरमधील चार शुभ मुहूर्त

२१ नोव्हेंबर २०२६, शनिवार: नोव्हेंबर महिन्यातील विवाहाचा पहिला शुभ मुहूर्त २१ नोव्हेंबर रोजी आहे. या दिवशी सकाळी ६ वाजून ४७ मिनिटांपासून मध्यरात्री १२ वाजून ८ मिनिटांपर्यंत विवाहासाठी शुभ वेळ आहे. या काळात रेवती नक्षत्र असेल.

२४ नोव्हेंबर २०२६, मंगळवार: विवाहासाठी पुढील शुभ मुहूर्त २४ नोव्हेंबर रोजी आहे. या दिवशी रात्री ११ वाजून २५ मिनिटांपासून २५ नोव्हेंबर रोजी सकाळी ६ वाजून ५० मिनिटांपर्यंत विवाह करता येईल. या काळात रोहिणी नक्षत्र असेल.

२५ नोव्हेंबर २०२६, बुधवार: २५ नोव्हेंबर रोजीही विवाहासाठी शुभ मुहूर्त आहे. या दिवशी सकाळी ६ वाजून ५० मिनिटांपासून २६ नोव्हेंबर रोजी सकाळी ६ वाजून ५१ मिनिटांपर्यंत शुभ वेळ आहे. या काळात रोहिणी आणि मृगशीर्ष नक्षत्र असतील. नोव्हेंबर महिन्यातील हा सर्वात मोठा विवाह मुहूर्त आहे.

२६ नोव्हेंबर २०२६, गुरुवार: नोव्हेंबर महिन्यातील विवाहासाठीचा शेवटचा शुभ मुहूर्त २६ नोव्हेंबर रोजी आहे. या दिवशी सकाळी ६ वाजून ५१ मिनिटांपासून संध्याकाळी ५ वाजून ४७ मिनिटांपर्यंत विवाहासाठी शुभ वेळ आहे. या काळात मृगशीर्ष नक्षत्र असेल.

विवाहासाठी शुभ मुहूर्त पाहणे का महत्त्वाचे?

हिंदू धर्म आणि वैदिक परंपरेनुसार विवाहाची तारीख आणि वेळ ठरवताना शुभ मुहूर्त पाहण्याला महत्त्व आहे. ज्योतिषशास्त्रानुसार विवाहाचा मुहूर्त ठरवताना तिथी, वार, नक्षत्र, योग आणि करण या पंचांगातील पाच अंगांचा विचार केला जातो. यासोबतच गुरु आणि शुक्र या ग्रहांची स्थितीही पाहिली जाते. धार्मिक मान्यतेनुसार अनुकूल ग्रहस्थिती आणि नक्षत्रांमध्ये विवाह केल्यास वधू-वरांच्या वैवाहिक जीवनात सुख, शांती आणि स्थैर्य राहते. विवाहाची वेळ ठरवताना वधू-वरांच्या जन्मकुंडलीचेही मिलन केले जाते. यामध्ये मंगळदोष आणि इतर ग्रहस्थिती तपासून योग्य वेळ निवडली जाते.

सदर लेखातील माहिती केवळ ज्योतिषशास्त्रीय गृहीतके आणि उपलब्ध माहितीवर आधारित आहे.

स्रोत: मूळ बातमी