बॅन असूनही ‘गोरी’ क्रीमची खुलेआम विक्री, धोक्याची घंटा

पाकिस्तानातील ‘गोरी ब्यूटी क्रीम’ भारतात बॅन आहे. या क्रीमची विक्री केल्यास कायदेशीर कारवाई केली जाते. तरीदेखील या क्रीमची खुलेआम विक्री केली जात असल्याची गंभीर बाब समोर आली आहे. दिवाळीच्या काळातही या क्रीमची खुलेआम विक्री केली जात होती. त्यामुळे या क्रीमच्या विक्रीचा मुद्दा पुन्हा एकदा चर्चेच्या केंद्रस्थानी आला आहे. महाराष्ट्र आणि मध्य प्रदेशमध्ये या क्रीमची खुलेआम विक्री केली जात आहे. काही ई-प्लॅटफॉर्म्सवरही या क्रीमची विक्री होत असून, तिची किंमत ३८० ते ८०० रुपये सांगितली जात आहे.

पारा आणि लीडचे प्रमाण मर्यादेपेक्षा जास्त

‘गोरी ब्यूटी क्रीम’मुळे त्वचा गोरी होते, असा दावा केला जातो. सर्वाधिक चिंताजनक बाब म्हणजे या क्रीममध्ये पाऱ्याचे तसेच लीडचे प्रमाण ठरवून दिलेल्या प्रमाणापेक्षा जास्त आहे. नियमानुसार एखाद्या क्रीममध्ये पारा या धातूचे प्रमाण १ पीपीएम असणे गरजेचे आहे. परंतु या क्रीममध्ये पाऱ्याचे प्रमाण ५ पीपीएम आहे. तज्ज्ञांच्या मतानुसार, पारा मानवी शरीरात प्रवेश करतो. त्याचा शरीरातील मेलॅनिन निर्मितीवर परिणाम होतो आणि त्वचा उजळ दिसायला लागते. परंतु यामुळे शरीरात गंभीर समस्या निर्माण होऊ शकतात.

परदेशातही बंदी, १८ महिलांना त्रास

एका रिपोर्टनुसार, या क्रीमच्या वापरामुळे १८ महिलांना मूत्रपिंडाशी संबंधित अडचणी निर्माण झाल्याचे समोर आले आहे. म्हणूनच या क्रीमवर बंदी घालण्यात आली. या क्रीमच्या ब्रँडशी संबंधित उत्पादनांवर परदेशातही कारवाई झालेली आहे. न्यूझिलंडच्या मेडिसिन रेग्यूलेटर मेडसेफ या संस्थेने गोरीच्या काही उत्पादनांवर बंदी घातली आहे. फिलिपिन्सच्या एफडीएनेदेखील २०२५ साली या ब्रँडच्या काही उत्पादनांवर गंभीर प्रश्न उपस्थित केले होते. पाकिस्तानातील कोणतेही उत्पादन भारतात आणण्यास सध्या बंदी आहे. भारत-पाकिस्तान व्यापारही बंद आहे. तरीदेखील ही क्रीम विक्रीस उपलब्ध झाल्याने याबाबतचा तपास केला जात आहे. या क्रीमची विक्री समोर आल्यानंतर आता भविष्यात काय होणार, हे पाहणे महत्त्वाचे ठरणार आहे.

स्रोत: मूळ बातमी