धुळे : येथील साक्री रोडवरील विद्यावर्धिनी महाविद्यालयाच्या मैदानावर १४ नोव्हेंबरपासून खुल्या गटाच्या बॉल बॅडमिंटन लीग स्पर्धेला सुरुवात होणार आहे. शिवस्वराज्य प्रतिष्ठान महाराष्ट्र, जिल्हा बॉल बॅडमिंटन असोसिएशन आणि विद्यावर्धिनी महाविद्यालय यांच्या संयुक्त विद्यमाने ही स्पर्धा आयोजित करण्यात आली आहे. जिल्ह्यात तब्बल १० ते १२ वर्षांनंतर खुल्या गटाची बॉल बॅडमिंटन स्पर्धा होत असल्याने खेळाडूंमध्ये उत्साहाचे वातावरण आहे.
युवा खेळाडूंना संधी मिळावी, हा उद्देश
ही स्पर्धा लीग पद्धतीने खेळवली जाणार आहे. याद्वारे युवा आणि होतकरू खेळाडूंना आपले क्रीडागुण दाखवण्याची संधी मिळावी आणि त्यांना प्रोत्साहन लाभावे, हा आयोजकांचा मुख्य उद्देश आहे. स्पर्धेत धुळे जिल्ह्यासह नंदुरबार, नाशिक, जळगाव, छत्रपती संभाजीनगर, कन्नड आणि चाळीसगाव येथील संघ सहभागी होणार आहेत. त्यामुळे या स्पर्धेला प्रादेशिक स्वरूप प्राप्त झाले आहे.
विजेत्यांना आकर्षक करंडक आणि बक्षिसे
स्पर्धेतील अंतिम तीन विजयी संघांना आकर्षक करंडकासह विविध वैयक्तिक बक्षिसे देण्यात येणार आहेत. या स्पर्धेला प्रा. भिकाजी बोरसे, प्रा. व्ही. एल. पाटील, प्रा. कैलास बोरसे, जिल्हा बॉल बॅडमिंटन असोसिएशनचे उपाध्यक्ष नितीन भामरे आणि महाराष्ट्र बॉल बॅडमिंटन असोसिएशनचे सहसचिव परेश उपकारे यांचे मार्गदर्शन लाभणार आहे, अशी माहिती शिवस्वराज्य प्रतिष्ठान महाराष्ट्राचे अध्यक्ष भालचंद्र सोनागत यांनी दिली. स्पर्धेत सहभागी होऊ इच्छिणाऱ्या संघांनी आयोजकांशी संपर्क साधावा, असे आवाहन करण्यात आले आहे.
स्रोत: मूळ बातमी
Leave a Reply