दिवाळीच्या निमित्ताने नळदुर्ग शहरात पारंपरिक म्हशी पळवणे आणि किल्ले बांधणी या दोन स्पर्धा मोठ्या उत्साहात पार पडल्या. नळदुर्गसह चव्हाणवाडी, जखनी तांडा, मुर्टा, अणदूर, केशेगाव, कसई, कासेगाव आणि सोलापूर येथील पशुपालकांनी या स्पर्धांमध्ये सहभाग नोंदवला. पारंपरिक खेळांच्या माध्यमातून सणाचा आनंद द्विगुणित झाला.
म्हशी पळवण्याच्या स्पर्धेचे निकाल
खांड म्हैस पळवण्याच्या गटात अजय जाधव यांनी प्रथम, सोमनाथ पवार यांनी द्वितीय, तर मुर्टा येथील लक्ष्मण करदुरे यांनी तृतीय क्रमांक पटकावला. एकल म्हैस पळवण्याच्या गटात रजाक शेख प्रथम, जफर टेलर द्वितीय आणि विजय अवचार तृतीय आले. नगराध्यक्ष बसवराज धरणे यांच्या हस्ते स्पर्धेचे उद्घाटन झाले. आमदार प्रवीण स्वामी आणि मल्हार पाटील यांनी स्पर्धास्थळी भेट देऊन पशुपालकांशी संवाद साधला. दिवंगत सुधाकर चव्हाण यांच्या स्मरणार्थ प्रवीण चव्हाण यांच्यातर्फे म्हैस पळवणाऱ्या पशुपालकांना तीन लिटर क्षमतेचे दुधाचे कॅन भेट देण्यात आले. अजय जाधव, जफर टेलर, पिल्लू मुळे, तानाजी जाधव आणि उत्तम जाधव यांनी पंच म्हणून काम पाहिले.
किल्ले बांधणी स्पर्धेत विद्यार्थ्यांचा सहभाग
किल्ले बांधणी स्पर्धेत शहरातील विद्यार्थ्यांच्या विविध गटांनी सहभाग घेतला. प्रा. संतोष पवार आणि मुख्याध्यापक श्रीनिवास भोसले यांनी परीक्षक म्हणून किल्ल्यांची पाहणी केली. राजमुद्रा ग्रुप (भुईगल्ली) प्रथम, शंभूराजे ग्रुप (मराठा गल्ली) द्वितीय, तर ए. बी. ग्रुप (बसवेश्वर चौक) तृतीय आला. ज्ञानेश्वरी सुरवसे आणि पद्माक्ष सुरवसे यांना उत्तेजनार्थ पारितोषिक देण्यात आले. या उपक्रमासाठी शिवसेना उद्धव बाळासाहेब ठाकरे पक्षाच्या पदाधिकाऱ्यांनी परिश्रम घेतले.
स्रोत: मूळ बातमी
Leave a Reply