दिवाळीच्या काळात खरेदीसाठी बाजारपेठांमध्ये प्रचंड गर्दी होते आणि याच गर्दीचा फायदा घेऊन पाकीटमार व चोरटे सक्रिय होतात. महिलांच्या गळ्यातील सोनसाखळ्या, पर्स, भ्रमणध्वनी आणि रोख रक्कम चोरीला जाण्याच्या घटना दरवर्षी समोर येतात. मात्र यंदा उल्हासनगरमध्ये पोलिसांनी केलेल्या काटेकोर नियोजनामुळे चोरीच्या घटनांना मोठ्या प्रमाणात आळा बसला असून व्यापारी व ग्राहकांनी या उपाययोजनांबद्दल समाधान व्यक्त केले आहे.
बाजारपेठांमध्ये कडक बंदोबस्त
उल्हासनगर हे मोठे व्यापारी केंद्र म्हणून ओळखले जाते. शहराच्या पश्चिम भागात कापड, फर्निचर, तयार कपडे, इलेक्ट्रॉनिक वस्तू, भांडी, सराफी आणि पादत्राणांची मोठी बाजारपेठ आहे. दिवाळीच्या दिवसांत येथे उल्हासनगरसह कल्याण, अंबरनाथ आणि बदलापूर परिसरातूनही मोठ्या संख्येने ग्राहक खरेदीसाठी येतात. गर्दीचा फायदा घेऊन पाकीटमार, भ्रमणध्वनी चोरणारे आणि महिलांच्या पर्समधील मौल्यवान वस्तू लंपास करणाऱ्या टोळ्या सक्रिय होण्याची शक्यता असते.
यापूर्वी गर्दीत धक्काबुक्की करून खिसे साफ करणे, महिलांच्या पर्समधून रोख व भ्रमणध्वनी चोरणे आणि दुचाकी लंपास करणे अशा घटनांमुळे नागरिकांना आर्थिक फटका बसत होता. ही बाब लक्षात घेऊन यंदा पोलिस उपायुक्त सचिन गोरे आणि सहाय्यक पोलिस आयुक्त शंकर आवताडे यांच्या मार्गदर्शनाखाली विशेष बंदोबस्त करण्यात आला. उल्हासनगर पोलिस ठाण्याचे वरिष्ठ निरीक्षक संतोष आव्हाड यांनी नेहरू चौक, शिरू चौक, गोलमैदान आणि अमन टॉकीज चौक परिसरात, तर मध्यवर्ती पोलिस ठाण्याचे वरिष्ठ निरीक्षक अशोक कोळी यांनी छत्रपती शिवाजी महाराज चौकातील इलेक्ट्रॉनिक बाजार, फर्निचर बाजार आणि १७ सेक्शनमधील भ्रमणध्वनी बाजारात बंदोबस्त ठेवला. विठ्ठलवाडी पोलिस ठाण्याचे वरिष्ठ निरीक्षक चंद्रहार गोडसे यांनी कॅम्प क्रमांक चारमधील बाजारपेठेत, तर हिललाइन पोलिस ठाण्याचे वरिष्ठ निरीक्षक संदीप शिवले यांनी कॅम्प क्रमांक पाचमध्ये सुरक्षेची जबाबदारी सांभाळली.
सुरक्षित खरेदीचे वातावरण
या नियोजनामुळे ग्राहकांना निर्धास्तपणे खरेदी करता आली. सणाच्या काळात नागरिक आनंदी असावेत, खरेदीसाठी येणाऱ्यांना सुरक्षिततेची हमी मिळावी आणि व्यापाऱ्यांचा धंदा सुरळीत चालावा, हाच या नियोजनामागचा उद्देश होता, असे उपायुक्त सचिन गोरे यांनी सांगितले. सुरक्षिततेच्या दृष्टीने यंदाची दिवाळी समाधानकारक ठरल्याचेही त्यांनी नमूद केले.
स्रोत: मूळ बातमी
Leave a Reply