तरुणांनी घडवली प्रतापगडाची हुबेहूब प्रतिकृती

मुंबईतल्या सात तरुणांनी छत्रपती शिवाजी महाराजांच्या काळातील प्रतापगडाची हुबेहूब प्रतिकृती तयार केली आहे. गड-किल्ल्यांचा इतिहास नव्या पिढीपर्यंत पोहोचवावा, या उद्देशाने हा उपक्रम हाती घेण्यात आला. कामाक्षी कुलकर्णी यांच्या मार्गदर्शनाखाली तरुणांनी सुमारे २२ ते २५ दिवस मेहनत करून ही प्रतिकृती उभारली.

माती आणि रंगांतून उभा राहिला गड

प्रतिकृतीसाठी विटा, लाल माती, शाडू माती, वर्तमानपत्रांचे कागद आणि विविध रंग वापरण्यात आले. लाल मातीच्या साहाय्याने डोंगरांचा आकार तयार करण्यात आला, तर शाडू मातीपासून बुरुज, तटबंदी, पायऱ्या आणि मंदिरांची रचना साकारण्यात आली. किल्ल्याचे बुरूज, तटबंदी, प्रवेशद्वार, मंदिरे आणि डोंगररांगांचे बारकावे प्रतिकृतीत उतरवण्याचा प्रयत्न करण्यात आला. कामाची विभागणी करून सर्वांनी एकत्रितपणे हा उपक्रम पूर्ण केला. बांधकाम आणि रचनेविषयी मिस्त्री काकांनीही मार्गदर्शन करत सहकार्य केले.

इतिहास कृतीतून समजून घेण्याचा प्रयत्न

या उपक्रमात अन्वेश कुलकर्णी, सिद्धेश नेवरेकर, आर्यन देसाई, ध्रुव भिंगार्डे, कौशिक निघडे, प्राची माळी आणि आरुषी गोयर सहभागी झाले होते. प्रत्येकाने वेगवेगळ्या जबाबदाऱ्या सांभाळल्या. गड-किल्ल्यांचा इतिहास केवळ पुस्तकांपुरता मर्यादित न ठेवता तो प्रत्यक्ष कृतीतून समजून घ्यावा, असा या तरुणांचा प्रयत्न आहे. प्रतापगडाच्या प्रतिकृतीच्या माध्यमातून किल्ल्याची रचना आणि त्याच्याशी जोडलेल्या ऐतिहासिक घटनांची माहिती जाणून घेण्याची संधी मिळत आहे.

स्रोत: मूळ बातमी