दुबईत दिवाळीनिमित्त सोन्याच्या दागिन्यांची रांगोळी

सोन्या-चांदीच्या किमती दिवसेंदिवस वाढत असताना दुबईतील एका मॉलमध्ये चक्क सोने आणि हिऱ्यांनी साकारलेली रांगोळी सर्वांचे लक्ष वेधून घेत आहे. या रांगोळीचा व्हिडिओ सोशल मीडियावर मोठ्या प्रमाणात व्हायरल झाला असून, ती पाहून नेटकऱ्यांनी आश्चर्य व्यक्त केले आहे.

दुबईतील सिटी सेंटर देयरा या प्रसिद्ध मॉलमध्ये दिवाळीनिमित्त ही खास सोनेरी रांगोळी तयार करण्यात आली. दागिन्यांचा ब्रँड डॅमस आणि दुबईतील फेस्टिव्हल्स अँड रिटेल इस्टॅब्लिशमेंट यांच्या सहकार्याने हा अनोखा उपक्रम राबवण्यात आला. भारतीय परंपरेतील रांगोळीला एक शाही आणि आलिशान रूप देण्याचा प्रयत्न यातून करण्यात आला आहे.

६.५ किलो सोने, ३८० कॅरेटपेक्षा जास्त हिरे

या रांगोळीचे सर्वात मोठे वैशिष्ट्य म्हणजे तिच्यासाठी वापरण्यात आलेले मौल्यवान दागिने. तब्बल ६.५ किलो वजनाचे २१३ दागिने या रांगोळीत वापरण्यात आले. यामध्ये सोन्याचे हार, जाड बांगड्या, झुमके आणि पेंडंट्स यांचा समावेश आहे. एवढेच नाही, तर या दागिन्यांमध्ये ३८० कॅरेटपेक्षा जास्त वजनाचे अस्सल हिरेही आहेत. ही रांगोळी २ बाय २ मीटर आकाराची आहे.

१० कारागिरांची १६ तासांची मेहनत

अशी रांगोळी तयार करणे हे काही साधे काम नव्हते. प्रत्येक दागिना योग्य जागी ठेवून त्यातून सुंदर नक्षी साकारण्यासाठी प्रचंड मेहनत लागली. यासाठी १० कुशल कारागिरांनी सलग १६ तास काम केले. या सोनेरी रांगोळीचा व्हिडिओ दुबई फेस्टिव्हल्स अँड रिटेल इव्हेंट्स या सोशल मीडिया पेजवरून शेअर करण्यात आला. मॉलमध्ये एवढ्या मोठ्या प्रमाणात सोने आणि हिरे उघड्यावर ठेवलेले पाहून नेटकरी थक्क झाले आहेत. एका नेटकऱ्याने ही रांगोळी अप्रतिम असल्याचे म्हटले, तर दुसऱ्याने इतके सोने सार्वजनिक ठिकाणी ठेवणे दुबईतच शक्य असल्याचे म्हटले आहे.

स्रोत: मूळ बातमी