राज्यात दोन्ही राष्ट्रवादी एकत्र येण्याबाबत उलटसुलट चर्चा सुरू असतानाच राष्ट्रवादीच्या अध्यक्षा आणि राज्याच्या उपमुख्यमंत्री सुनेत्रा पवार यांनी बारामतीत माध्यमांशी बोलताना सूचक प्रतिक्रिया दिली. जशी वेळ येईल तशा गोष्टी आपल्याला कळतीलच, असे त्या म्हणाल्या.
भेटीगाठींवरून चर्चांना वेग
अजित पवार यांच्या राष्ट्रवादीतील आमदारांनी ज्येष्ठ नेते शरद पवार यांची भेट घेण्यासाठी वेळ मागितल्याचे वृत्त समोर आले होते. या संभाव्य भेटीमुळे विलीनीकरणाच्या आणि नव्या राजकीय घडामोडींच्या चर्चांना वेग आला होता. मात्र शरद पवार कुणालाही भेटणार नसल्याची माहिती समोर आली आहे. आमचे आमदार शरद पवारांना भेटायला जाणार नाहीत, अशी माहिती उमेश पाटील यांनी दिली. विलीनीकरणासंदर्भात कोणतीही चर्चा सुरू नसल्याचेही त्यांनी सांगितले.
नेत्यांच्या प्रतिक्रिया
राष्ट्रवादीचे नेते अमोल मिटकरी यांनी समाजमाध्यमावर पोस्ट करत म्हटले की, सुनेत्रा पवार या पक्षाच्या राष्ट्रीय अध्यक्षा आहेत. पक्षाच्या हिताच्या दृष्टीने त्या जो काही निर्णय घेतील तो अजित पवार यांच्या सर्वसामान्य कार्यकर्त्यांना मान्य असेल. नेत्यांपेक्षा कार्यकर्ता महत्त्वाचा हे अजित पवार यांचे ब्रीद त्यांनी पूर्वीही जपले होते आणि आजही जपत आहेत. पक्षहितासह महाराष्ट्राच्या हिताच्या दृष्टीने निर्णय घ्यायला त्या सक्षम आणि खंबीर असल्याचे मिटकरी म्हणाले.
दरम्यान, अजित पवार यांच्या राष्ट्रवादीचे आमदार विलीनीकरणाबाबत शरद पवार यांची भेट घेणार असल्याचे वृत्त आमदार अनिल भाईदास पाटील यांनी फेटाळले. विलीनीकरणाबाबत माध्यमांमधून चर्चा दिसत असली तरी तसे काही आपल्याला दिसत नसल्याचे ते म्हणाले. पार्थ पवार यांनी पवार यांची भेट घेतली असेल तर ती दिवाळीनिमित्त तब्येतीची विचारपूस करण्यासाठी होती, असे पाटील म्हणाले. प्रफुल्ल पटेल यांनीही शरद पवार रुग्णालयात असताना त्यांची विचारपूस केली होती. अनेक वर्षे सोबत काम केलेल्या ज्येष्ठ नेत्याची विचारपूस करणे ही महाराष्ट्राची संस्कृती असल्याचे त्यांनी सांगितले. सर्व आमदार सध्या आपापल्या मतदारसंघात असल्याने शरद पवार यांना भेटायला जाण्याचे अजून ठरलेले नाही, असेही पाटील म्हणाले.
स्रोत: मूळ बातमी
Leave a Reply