अहिल्यानगर जिल्ह्याच्या शेवगाव नगरपरिषदेच्या राजकारणात उपमुख्यमंत्री एकनाथ शिंदे यांच्या नेतृत्वाखालील शिवसेनेची अवस्था सध्या चर्चेचा विषय ठरली आहे. एका बाजूला पक्षाकडे नगराध्यक्ष आणि चार नगरसेवक असताना, प्रत्यक्षात मात्र शहरात शिवसेनेचे तीन-तीन वेगवेगळे गट सक्रिय झाल्याचे उघड झाले आहे. या अंतर्गत धुसफुसीमुळे शेवगावची जनता पूर्णपणे संभ्रमात पडली आहे.
शेवगावच्या इतिहासात पहिल्यांदाच जनतेतून थेट निवडून आलेले शिवसेनेचे पहिले नगराध्यक्ष माया मुंढे या पदावर आहेत. त्यांच्यासोबत अमर पुरनाळे, आशुतोष डहाळे, शिवानी काथवडे यांच्या रूपाने नगरसेवक आणि साईनाथ आधाट यांच्या रूपाने स्वीकृत नगरसेवक असे तगडे बळ पाठीशी असतानाही, अवघ्या काही महिन्यांतच पक्षात गटबाजीचे ढग दाटले आहेत.
बॅनरवरून नगराध्यक्षांचे नाव गायब
शेवगावात नुकताच एक अभिनंदनपर बॅनर चांगलाच चर्चेचा विषय ठरला आहे. शेवगाव नगरपरिषदेच्या शिवसेना पक्षाच्या गटनेतेपदी अमर पुरनाळे यांच्या निवडीनिमित्त लावण्यात आलेल्या या बॅनरवर साईनाथ आधाट, आशुतोष डहाळे आणि शिवानी रोहित काथवडे यांची नावे व छायाचित्रे झळकली आहेत. परंतु, या संपूर्ण राजकीय घडामोडींच्या केंद्रस्थानी असणारे अरुण मुंढे आणि नगराध्यक्ष माया मुंढे यांचे नाव किंवा छायाचित्र या बॅनरवरून टाळल्याची चर्चा संपूर्ण शहरात रंगली आहे. यामुळे शिवसेनेत एक नाही तर दोन-तीन समांतर गट कार्यरत असल्याच्या चर्चेवर शिक्कामोर्तब झाले आहे.
विकासकामांतील टक्केवारीवरून वाद?
शेवगावच्या राजकीय वर्तुळातून मिळणाऱ्या माहितीनुसार, पक्षातील ही अंतर्गत कलह आणि विसंवाद केवळ वैचारिक नसून विकासकामांमध्ये मिळणाऱ्या टक्केवारी आणि आपापल्या हद्दीच्या वर्चस्वावरून असल्याचे बोलले जात आहे. एकीकडे अरुण मुंढे हे स्वतःला भावी आमदार समजून ताकद वाढवण्याचा प्रयत्न करत असले, तरी त्यांना आपले मूळ चार नगरसेवकही व्यवस्थित हाताळता येत नसल्याचे चित्र आहे. तर दुसरीकडे, पक्षात प्रवेश केलेले इतर नेते आणि हर्षदाताई काकडे यांचे वेगळे राजकारण सुरू असल्यामुळे पक्षाची ताकद वाढण्याऐवजी ती आपापसातच तुटताना दिसत आहे.
एकाच पक्षाच्या मंडळींमध्ये सुरू असलेल्या या अंतर्गत धुसफुसीमुळे शेवगाव शहरातील विकासाचा बोजवारा उडाला आहे. जनतेत शिवसेना आणि मनात मात्र गटबाजी असा दुहेरी खेळ खेळणाऱ्या नेत्यांमुळे सर्वसामान्य जनतेचा विकास रखडला असून, आगामी काळात शेवगाव नगरपरिषदेचा कारभार कसा चालणार, असा तीव्र संताप नागरिक व्यक्त करत आहेत. आता या प्रकरणी शिवसेना पक्षश्रेष्ठी नेमकी काय भूमिका घेणार आणि शेवगावच्या या विखुरलेल्या गटांना एकत्र आणण्यासाठी कोणता मोठा निर्णय घेतला जाणार, याकडे संपूर्ण अहिल्यानगर जिल्ह्याचे लक्ष लागून आहे.
स्रोत: मूळ बातमी
Leave a Reply