अहिल्यानगर जिल्ह्यात ऊसदराचा प्रश्न अद्याप सुटलेला नाही. पालकमंत्री राधाकृष्ण विखे यांच्या अध्यक्षतेखाली झालेली दुसरी बैठकही निष्फळ ठरली. उद्या सायंकाळपर्यंत ऊसदर निश्चित करण्याचे निर्देश विखे यांनी कारखान्यांच्या चेअरमनना दिले आहेत. अन्यथा ऊसाचे काटे, साखर कारखाने आणि प्रमुख महामार्ग बंद पाडण्याचा इशारा शेतकऱ्यांनी दिला आहे.
दोन-तीनच चेअरमन उपस्थित, निर्णय लांबणीवर
बैठकीला मोजकेच दोन ते तीन कारखान्यांचे चेअरमन उपस्थित होते. त्यामुळे ऊसदराचा निर्णय लांबणीवर गेल्याची माहिती समोर आली आहे. कारखाने आर्थिक अडचणीत असल्याने जिल्हा बँकेच्या नवनिर्वाचित पदाधिकाऱ्यांशी चर्चा करून दर निश्चित करणार असल्याची माहिती विखे पाटलांनी दिली आहे.
जिल्हाधिकारी कार्यालयाबाहेर घोषणाबाजी
बैठकीत निर्णय न झाल्याने ऊस उत्पादक शेतकरी संघटना आक्रमक झाल्या. जिल्हाधिकारी कार्यालय परिसरात त्यांनी जोरदार घोषणाबाजी केली. उद्या सायंकाळपर्यंत निर्णय न झाल्यास ऊसाचे काटे, साखर कारखाने आणि जिल्ह्यातील प्रमुख महामार्ग बंद पाडण्याचा इशारा शेतकऱ्यांनी दिला आहे. आता उद्याच्या बैठकीत तरी ऊसदराचा तिढा सुटणार का, याकडे सर्वांचं लक्ष लागलं आहे.
स्रोत: मूळ बातमी
Leave a Reply