रेल्वे प्रशासनाने कोकण रेल्वे मार्गावर धावणाऱ्या काही महत्त्वाच्या रेल्वेगाड्यांचे क्रमांक तसेच प्रवर्ग बदलण्याचा निर्णय घेतला आहे. या निर्णयानुसार संबंधित गाड्यांचे जुने क्रमांक बदलून नवीन क्रमांक देण्यात येणार असून, काही गाड्यांचे सुपरफास्ट आणि एक्स्प्रेस असे वर्गीकरणही बदलण्यात येणार आहे. हे बदल १ जानेवारी २०२७ पासून लागू होणार आहेत.
कोणत्या गाड्यांचे क्रमांक बदलले
कोकण मार्गावरील पाच गाड्यांचे क्रमांक बदलत आहेत. तिरुवनंतपुरम नॉर्थकडे जाणारी लोकमान्य टिळक टर्मिनस एक्स्प्रेस सुपरफास्टमधून एक्स्प्रेस श्रेणीत येत आहे. तिचा जुना २२११३ आणि २२११४ क्रमांक आता अनुक्रमे ११०७३ आणि ११०७४ होईल आणि चार व पाच जानेवारीपासून ती नव्या क्रमांकाने धावेल. लोकमान्य टिळक टर्मिनस-करमाळी एक्स्प्रेसला २२११५ आणि २२११६ ऐवजी अनुक्रमे ११०५३ आणि ११०५४ क्रमांक मिळतील. सात जानेवारी २०२७ पासून हे क्रमांक लागू होतील. गरीब रथ एक्स्प्रेसही सुपरफास्टमधून एक्स्प्रेस श्रेणीत येत आहे. तिला २२२०१ आणि २२२०२ ऐवजी अनुक्रमे १६३७१ आणि १६३७२ क्रमांक मिळतील आणि दोन व तीन जानेवारीपासून ती नव्या क्रमांकाने धावेल. वास्को-द-गामा ते हजरत निजामुद्दीन गाडीला १२७७९ आणि १२७८० ऐवजी अनुक्रमे १७३७९ आणि १७३८० क्रमांक मिळतील. हे क्रमांक एक जानेवारीपासून लागू होतील. मडगाव जंक्शन आणि मंगळूर सेंट्रलदरम्यान धावणाऱ्या पॅसेंजर गाड्यांचे क्रमांक ५६६१५ आणि ५६६१६ वरून अनुक्रमे ५६२१६ आणि ५६२१५ होतील. तेही एक जानेवारीपासून लागू होतील. याशिवाय काचेगुडा-कुंमटा सुपरफास्ट एक्स्प्रेसचा क्रमांक १२७८९ आणि १२७९० वरून अनुक्रमे १७६८९ आणि १७६९० होईल. या गाडी क्रमांक १७६९०चे आरक्षण ११ नोव्हेंबरपासून पॅसेंजर रिझर्व्हेशन सिस्टीम, इंटरनेट आणि आयआरसीटीसी संकेतस्थळावर सुरू झाले आहे. ही गाडी १ आणि २ जानेवारी २०२७ पासून नवीन क्रमांक व वेळापत्रकानुसार धावेल.
प्रवाशांना फायदा होणार
सुपरफास्ट श्रेणीतून एक्स्प्रेस श्रेणीत रूपांतरित करण्यात आलेल्या गाड्यांसाठी आता सुपरफास्ट अधिभार आकारला जाणार नाही. त्यामुळे या गाड्यांमधून प्रवास करणाऱ्या प्रवाशांच्या तिकीट दरात काही प्रमाणात बचत होण्याची शक्यता आहे.
स्रोत: मूळ बातमी
Leave a Reply