काही वर्षांपूर्वी कोरोनाने जगभरात धुमाकूळ घातला होता. भारतातही या आजाराचा मोठ्या प्रमाणावर प्रसार झाला. पहिल्या आणि दुसऱ्या लाटेत मिळून लाखो लोकांना जीव गमवावा लागला. चीनमधून सुरू झालेला हा आजार काही दिवसांत जगभर पसरला आणि अनेक देशांना लॉकडाऊन लावावा लागला. त्यामुळे प्रचंड नुकसान झाले. आता कोरोनानंतर आणखी एका आजाराने जगाची चिंता वाढवली आहे.
डेमोक्रेटिक रिपब्लिक ऑफ कांगोमध्ये इबोलाने हाहाकार उडवला आहे. कांगोच्या आरोग्य मंत्रालयाने दिलेल्या आकडेवारीनुसार आतापर्यंत ११,०४२ लोकांना इबोलाची लागण झाली आहे. ही आतापर्यंतची देशातील सर्वात चिंताजनक स्थिती असल्याचे सांगण्यात येत आहे. या आजारामुळे आतापर्यंत ५,३८७ लोकांचा मृत्यू झाला आहे. म्हणजेच लागण झालेल्यांपैकी जवळपास ५० टक्के लोकांचा मृत्यू झाला आहे.
कांगोतील परिस्थिती किती गंभीर?
कांगोमधील २६ पैकी ८ प्रांतांमध्ये इबोलाचा प्रभाव प्रचंड तीव्र गतीने वाढला आहे. त्यामुळे संपूर्ण देशात आणीबाणीसदृश स्थिती निर्माण झाली आहे. गेल्या मे महिन्यात कांगोमध्ये इबोलाच्या प्रभावाला सुरुवात झाली होती. तेव्हापासून साथ नियंत्रणात आणण्यासाठी युद्धपातळीवर प्रयत्न सुरू आहेत. मात्र अजूनही साथ नियंत्रणात आणण्यात यश आलेले नाही. उलट या आजाराचा प्रभाव वाढतच चालला आहे.
इबोला वेगाने पसरत असल्यामुळे कांगोच्या शेजारील देशांनाही धोका निर्माण झाला आहे. त्यामुळे आफ्रिकेतील इतर देशांमध्येही चिंतेचे वातावरण आहे.
उपचार आणि लसीची स्थिती
धोकादायक बाब म्हणजे अजूनही इबोला या आजारावर कोणताही खात्रीलायक उपचार उपलब्ध नाही. तसेच हा आजार होऊ नये यासाठी कोणतीही लस अजून बाजारात आलेली नाही. त्यामुळे प्रतिबंध आणि काळजी हाच सध्या एकमेव मार्ग असल्याचे तज्ज्ञ सांगतात.
दरम्यान संयुक्त राष्ट्रसंघानेही या आजारावर चिंता व्यक्त केली आहे. संयुक्त राष्ट्रसंघाकडून हाय अलर्ट जारी करण्यात आला आहे. इबोलाचा मृत्यूदर कोरोनापेक्षा जास्त असल्यामुळे तज्ज्ञांकडून चिंता व्यक्त केली जात आहे. कांगोमध्ये हा आजार एवढ्या तीव्र गतीने पसरत आहे की, आता आफ्रिकेमधील इतर देशांनाही मोठा धोका निर्माण झाला आहे.
स्रोत: मूळ बातमी
Leave a Reply