मुंबईतील केईएम रुग्णालयाच्या ऑर्थोपेडिक इमारतीतील लिफ्ट गेल्या आठवडाभरापासून बंद असल्याने रुग्णांचे प्रचंड हाल होत आहेत. फ्रॅक्चरग्रस्त, अपंग, अपघातग्रस्त आणि शस्त्रक्रियेनंतर उपचार घेणाऱ्या रुग्णांना जिन्याने वरच्या मजल्यांवर जावे लागत आहे. काही रुग्णांना व्हीलचेअर आणि स्ट्रेचरच्या मदतीने जिन्यांवरून नेले जात आहे. त्यामुळे रुग्णांच्या सुरक्षिततेचा प्रश्न निर्माण झाला आहे.
पायाला प्लॅस्टर केलेला एक रुग्ण शिड्यांवर बसून खाली उतरतानाचा व्हिडीओ समाजमाध्यमांवर व्हायरल झाल्यानंतर यावरून टीकेची झोड उठली आहे.
दुरुस्तीसाठी ठोस कार्यवाहीच नाही?
लिफ्ट बंद असतानाही रुग्णालय प्रशासन आणि संबंधित अभियांत्रिकी विभागाकडून दुरुस्तीसाठी ठोस कार्यवाही झालेली नसल्याचा आरोप होत आहे. लिफ्ट तातडीने सुरू करावी आणि या दिरंगाईला जबाबदार अधिकाऱ्यांची चौकशी करावी, अशी मागणी होत आहे.
या मुद्द्यावरून मुंबई महानगरपालिकेतील शिवसेनेचे गटनेते अमेय घोले यांनी पालिका प्रशासनावर सडकून टीका केली आहे. केईएम रुग्णालयाच्या ओपीडी विभागातील लिफ्ट अनेक दिवसांपासून बंद असल्याचे वृत्त अत्यंत संतापजनक असल्याचे त्यांनी म्हटले आहे. ज्येष्ठ नागरिक, दिव्यांग व्यक्ती आणि गंभीर आजारांनी त्रस्त रुग्णांना उपचारांसाठी जिने चढण्याची वेळ येत असेल, तर यापेक्षा मोठे अपयश कोणते, असा सवाल त्यांनी उपस्थित केला आहे.
रुग्णालयात उपचार घ्यायला येणाऱ्या रुग्णांना आधी जिने चढण्याची शिक्षा का, असा प्रश्नही घोले यांनी विचारला आहे. रुग्णालय प्रशासनाला रुग्णांच्या जीवाची आणि वेदनांची काहीच किंमत नाही का, असेही त्यांनी म्हटले आहे.
६ नोव्हेंबरला निविदा, मग समस्या आधीच का सुटली नाही?
धक्कादायक बाब म्हणजे केईएम रुग्णालयातील विविध लिफ्टच्या सुरक्षिततेसाठी आणि दुरुस्तीसाठी ६ नोव्हेंबर रोजी निविदा प्रसिद्ध झाल्याची माहिती समोर आली आहे. मग ही समस्या आधीच का सोडवण्यात आली नाही, असा सवाल घोले यांनी उपस्थित केला आहे.
महानगरपालिकेची रुग्णालये ही गोरगरिबांच्या उपचारासाठी आहेत, त्यांच्या सहनशीलतेची परीक्षा घेण्यासाठी नाहीत, असे घोले म्हणाले. फक्त लिफ्ट दुरुस्त करून हे प्रकरण संपणार नाही. या निष्काळजीपणाला जबाबदार कोण, हे निश्चित करून दोषींना शिक्षा झालीच पाहिजे, अशी त्यांची मागणी आहे. या प्रकरणात महानगरपालिका प्रशासनाने स्वतः लक्ष घालून तातडीने कारवाई करावी, असेही त्यांनी म्हटले आहे.
घोले यांच्या मागण्या
बंद असलेल्या लिफ्ट तातडीने दुरुस्त करून रुग्णांसाठी सुरक्षितपणे सुरू कराव्यात. लिफ्ट किती दिवसांपासून बंद आहेत, याचा संपूर्ण अहवाल सार्वजनिक करावा. संबंधित देखभाल कंत्राटदार, अभियंते आणि जबाबदार अधिकाऱ्यांची उच्चस्तरीय चौकशी करावी. चौकशीत दोषी आढळणाऱ्या अधिकाऱ्यांवर निलंबनासह कठोर शिस्तभंगाची कारवाई करावी आणि संबंधित कंत्राटदारावर दंडात्मक कारवाई करावी, अशा मागण्या घोले यांनी केल्या आहेत.
स्रोत: मूळ बातमी
Leave a Reply