रत्नागिरी शहरातील मध्यवर्ती भागात भीषण आगीची घटना घडली आहे. मारुती मंदिर परिसरात असलेल्या गिफ्ट आर्टिकलच्या दुकानाला भीषण आग लागली. या आगीत दुकानातील सर्व साहित्य जळून खाक झालं असून अडीच तासांनंतरही आगीवर नियंत्रण मिळवण्यात यश आलेलं नाही.
शॉर्टसर्किटमुळे आग लागल्याची शक्यता
प्राथमिक माहितीनुसार शॉर्टसर्किटमुळे ही आग लागल्याची शक्यता वर्तवण्यात येत आहे. दिवाळीनिमित्त दुकानात मोठ्या प्रमाणात प्लास्टिक साहित्य होतं, त्यामुळे आगीने वेगाने भडका घेतला. आज सकाळपासून वाऱ्याचा वेग जास्त असल्याने आगीला पसरण्यास मदत झाली.
बंबात पाणी नसल्याने स्थानिक संतप्त
घटनेची माहिती मिळताच अग्निशमन दलाच्या चार गाड्या घटनास्थळी दाखल झाल्या. मात्र नगरपरिषदेच्या बंबात पुरेसं पाणी नव्हतं, अशी माहिती स्थानिकांनी दिली आहे. वेळीच आग विझवण्यात अपयश आल्याने आगीने रौद्र रूप धारण केलं, असं स्थानिकांचं म्हणणं आहे. प्रशासनाच्या या कार्यपद्धतीवर स्थानिकांनी तीव्र नाराजी व्यक्त केली आहे.
खासगी कंपनीच्या बंबाची मदत
काही काळानंतर एमआयडीसीमधील खासगी कंपनीचे अग्निशमन बंब घटनास्थळी दाखल झाले आणि आगीवर नियंत्रण मिळवण्याचा प्रयत्न करण्यात आला. दुकानात कोट्यवधींचा माल असल्याचा अंदाज असून त्यातलं सामान वाचलेलं असेल असं वाटत नाही. सुदैवाने आतापर्यंत मोठी हानी झाल्याची माहिती नाही. हा भाग शहरातील मध्यवर्ती भाग असून आजूबाजूला इतर कार्यालयं आणि घरं आहेत, त्यामुळे वेळीच आग विझवणं महत्त्वाचं आहे.
स्रोत: मूळ बातमी
Leave a Reply