तुकाराम मुंढे म्हटले की डोळ्यांसमोर येतात ते कडक शिस्तीचे अधिकारी आणि नियम मोडणाऱ्यांवर थेट कारवाई करणारे आयएएस अधिकारी. आपल्या नोकरीच्या आतापर्यंतच्या २१ वर्षांच्या काळात तब्बल २५ वेळा त्यांची बदली झाली आहे. सध्या अन्न व औषध प्रशासनाचे आयुक्त म्हणून काम करताना त्यांनी हॉटेल्स, रेस्टॉरंट्स आणि खाद्यपदार्थांमध्ये भेसळ करणाऱ्यांविरोधात कठोर कारवाई सुरू केली आहे. आपल्या कामाची माहिती ते वेळोवेळी व्हिडिओ आणि पत्रकार परिषदांच्या माध्यमातून लोकांपर्यंत पोहोचवत असतात.
एफडीए आयुक्त म्हणून कारवाईचा धडाका
एफडीए आयुक्तपदाची जबाबदारी घेतल्यानंतर तुकाराम मुंढे यांनी अनेक ठिकाणी तपासणी सुरू केली. हॉटेल्स, रेस्टॉरंट्स, क्लब आणि खाद्यपदार्थ तयार करणाऱ्या ठिकाणी जाऊन नियम तपासण्यात आले. अन्नामध्ये भेसळ करणारे, स्वच्छतेचे नियम न पाळणारे आणि नागरिकांच्या आरोग्याशी खेळणाऱ्यांवर त्यांनी कारवाई केली. एवढेच नाही, तर सामान्य नागरिकांना तक्रार करता यावी यासाठी हेल्पलाइन आणि तक्रार नोंदवण्याची सुविधाही उपलब्ध करून देण्यात आली आहे. कोणत्या ठिकाणी काय कारवाई झाली आणि कुठे काय काळजी घ्यायची याची माहिती ते व्हिडिओ आणि पत्रकार परिषदांमधून देत असतात. खाद्यपदार्थ घेताना नागरिकांनी काय काळजी घ्यावी याबाबतही ते वारंवार सूचना करतात.
रॅपिड फायरमधील उत्तरे
कामाच्या पलीकडे तुकाराम मुंढे यांना काय आवडते, त्यांचा आवडता सिनेमा कोणता आणि पुढची बदली कधी होणार, अशाच काही प्रश्नांची उत्तरे त्यांनी वन-टू-वन रॅपिड फायरमध्ये एका मुलाखतीत दिली आहेत. आवडते हॉटेल कोणते, या प्रश्नावर त्यांनी अगदी थोडक्यात नो असे उत्तर दिले. आतापर्यंत भेटलेले सर्वात प्रामाणिक राजकारणी कोण, या प्रश्नावर देशात असे अनेक आहेत, पण एकाच व्यक्तीचे नाव सांगणे कठीण आहे, असे ते म्हणाले.
आवडता सिनेमा कोणता, या प्रश्नावर मुकद्दर का सिकंदर हा आपला आवडता सिनेमा असल्याचे त्यांनी सांगितले. आवडता हिरो कोण, या प्रश्नावर बोलताना आपला आवडता हिरो बदलत राहतो, असे उत्तर त्यांनी दिले. सर्वात महत्त्वाचे म्हणजे पुढची बदली कधी होणार, यावर त्यांनी हे कधीही होऊ शकते आणि त्यासाठी तयार रहावे लागते, असे उत्तर दिले. याशिवाय तुमची लेगसी म्हणजेच वारसा काय असेल, यावर ते म्हणाले की माझी कोणतीही लेगसी नाही. जनतेसाठी जे योग्य आहे ते करणे ही माझी जबाबदारी आहे, असे मी समजतो. त्यामुळे तुकाराम मुंढे यांच्या या रोखठोक उत्तरांची एकच चर्चा आहे.
स्रोत: मूळ बातमी
Leave a Reply