डोंगरांच्या कुशीत काही शांत दिवस घालवण्याचा आनंद वेगळाच असतो. उंच पर्वतरांगा, हिरवीगार जंगलं आणि थंडगार हवा यामुळे हिमाचल प्रदेश पर्यटकांच्या पसंतीच्या यादीत नेहमीच वरच्या स्थानावर असतो. अलीकडेच अभिनेत्री भाग्यश्री कामानिमित्त हिमाचलला गेली होती. तिथल्या निसर्गाचे सुंदर फोटो तिने समाजमाध्यमांवर शेअर केले. ते पाहून अनेकांना हिमाचलची सहल करण्याची इच्छा झाली असेल. आगामी सुट्टीत तुम्हीही हिमाचलला जाण्याचा विचार करत असाल, तर खालील तीन ठिकाणं तुमच्या यादीत नक्की ठेवा.
शिमला: डोंगरांची राणी
हिमाचलमधील सर्वांत लोकप्रिय ठिकाणांपैकी एक असलेल्या शिमल्याला डोंगरांची राणी म्हटलं जातं. उंच पर्वत, देवदाराची घनदाट झाडं आणि आल्हाददायक हवामान यामुळे इथे फिरण्याचा वेगळाच आनंद मिळतो. मॉल रोड आणि द रिज ही शिमल्याची प्रमुख आकर्षणं आहेत. मॉल रोडवर फिरताना अनेक दुकानं, कॅफे आणि स्थानिक खाद्यपदार्थांचा आस्वाद घेता येतो. कालका-शिमला टॉय ट्रेनमधून प्रवास करताना डोंगरांमधील निसर्ग अगदी जवळून पाहता येतो. निसर्गासोबत ऐतिहासिक वास्तू पाहायला आवडणाऱ्यांसाठीही शिमला उत्तम पर्याय आहे.
मनाली आणि धर्मशाळा
बर्फाच्छादित पर्वत, हिरव्यागार दऱ्या, खळाळणाऱ्या नद्या आणि थंड हवामान यामुळे मनाली पर्यटकांच्या आवडीचं ठिकाण आहे. इथलं निसर्गसौंदर्य प्रत्येक ऋतूत वेगळं रूप धारण करतं. मनालीत गेल्यावर देवदाराच्या उंच झाडांनी वेढलेल्या परिसरातील हिडिंबा देवी मंदिराला आवर्जून भेट द्यावी. महाभारतातील भीमाची पत्नी हिडिंबा हिला समर्पित हे मंदिर आपल्या वैशिष्ट्यपूर्ण लाकडी वास्तुरचनेसाठी प्रसिद्ध आहे. मंदिराभोवतीचा शांत परिसरही पर्यटकांना आकर्षित करतो.
धर्मशाळा हे निसर्गसौंदर्य आणि तिबेटी संस्कृती यांचा संगम असलेलं ठिकाण आहे. दलाई लामा यांचं निवासस्थान आणि तिबेटी संस्कृतीचं केंद्र म्हणून या शहराची ओळख आहे. इथला मॅक्लोडगंज परिसर पर्यटकांमध्ये विशेष लोकप्रिय आहे. सुंदर मठ, छोटी दुकानं आणि कॅफे इथे पाहायला मिळतात. शांत वातावरणात फिरण्यासोबत तिबेटी खाद्यपदार्थांचाही आस्वाद घेता येतो. कांगडा कला संग्रहालयाला भेट देऊन स्थानिक चित्रकला, कलाकृती आणि ऐतिहासिक वारशाची माहितीही जाणून घेता येते.
स्रोत: मूळ बातमी
Leave a Reply