WhatsApp वापरणाऱ्यांनो, ही ७ सुरक्षा सेटिंग्ज सुरू करा

WhatsApp वर मेसेज, कॉल व आर्थिक माहिती शेअर केली जाते, त्यामुळे सायबर फसवणुकीचा धोका वाढला आहे. खाते सुरक्षित ठेवण्यासाठी ही सात महत्त्वाची वैशिष्ट्ये सुरू करा.

आजच्या डिजिटल युगात WhatsApp चा वापर केवळ मेसेज पाठवण्यासाठीच नाही, तर व्हिडिओ कॉल, महत्त्वाची कागदपत्रं आणि आर्थिक व्यवहारांशी संबंधित माहिती शेअर करण्यासाठीही केला जातो. मात्र याच WhatsApp चा वापर सायबर गुन्हेगार लोकांची फसवणूक करण्यासाठी करत आहेत. कधी अनोळखी लिंक पाठवून, तर कधी पोलीस किंवा सरकारी अधिकारी असल्याचं भासवून नागरिकांना डिजिटल अरेस्टची धमकी दिली जाते. अशा वेळी तुमचं WhatsApp खातं सुरक्षित ठेवण्यासाठी काही महत्त्वाची सुरक्षा वैशिष्ट्यं उपयोगी ठरू शकतात.

ही ७ सुरक्षा वैशिष्ट्यं लगेच सुरू करा

१. अनोळखी कॉल्स होतील सायलेंट: WhatsApp मधील Silence Unknown Callers हे वैशिष्ट्य सुरू केल्यास अनोळखी नंबरवरून येणारे कॉल आपोआप सायलेंट होतात. यामुळे स्पॅम आणि संशयास्पद कॉल्सचा त्रास कमी होतो. यासाठी Settings मध्ये जाऊन Privacy आणि त्यानंतर Calls पर्याय निवडा.

आणखी वाचा ·एआयचा फटका: क्वांटास ८५० कर्मचाऱ्यांची कपात करणार

२. अनोळखी कॉलरची माहिती तपासा: काही अनोळखी कॉलर्सबाबत WhatsApp अतिरिक्त माहिती दाखवू शकतं. यामध्ये नंबर कोणत्या देशात नोंदणीकृत आहे आणि तुमचा संबंधित व्यक्तीसोबत कोणता कॉमन ग्रुप आहे का, याची माहिती मिळू शकते. त्यामुळे कॉल उचलण्यापूर्वी सावध राहता येतं.

३. Two-Step Verification सुरू करा: तुमच्या WhatsApp खात्याला अतिरिक्त सुरक्षा देण्यासाठी Two-Step Verification हे वैशिष्ट्य महत्त्वाचं आहे. Settings मध्ये Account आणि Two-Step Verification पर्याय निवडा. यामुळे खातं पुन्हा व्हेरिफाय करताना अतिरिक्त PIN आवश्यक असतो.

४. संशयास्पद नंबर ब्लॉक आणि रिपोर्ट करा: एखादी अनोळखी व्यक्ती पैशांची मागणी करत असेल, संशयास्पद लिंक पाठवत असेल किंवा वैयक्तिक माहिती मागत असेल, तर त्या नंबरला Block आणि Report करा.

५. Linked Devices नियमित तपासा: तुमचं WhatsApp खातं कोणत्या डिव्हाइसवर लॉगिन आहे, हे तपासण्यासाठी Settings मधील Linked Devices पर्याय उघडा. अनोळखी डिव्हाइस दिसल्यास त्वरित Log Out करा. कोणालाही लिंकिंग कोड देऊ नका किंवा अनोळखी QR कोड स्कॅन करू नका.

६. कॉलदरम्यान IP Address सुरक्षित ठेवा: Protect IP Address in Calls हे वैशिष्ट्य सुरू केल्यास WhatsApp कॉल कंपनीच्या सर्व्हरद्वारे रूट होतो. त्यामुळे समोरच्या व्यक्तीला तुमचा IP Address थेट दिसण्यापासून संरक्षण मिळतं. यासाठी Privacy मधील Advanced पर्यायात जा.

७. अनोळखी लोकांना ग्रुपमध्ये जोडण्यापासून रोखा: Settings मधील Privacy आणि Groups पर्याय निवडा. येथे My Contacts हा पर्याय निवडल्यास तुमच्या कॉन्टॅक्ट लिस्टमधील लोकांनाच तुम्हाला थेट ग्रुपमध्ये जोडता येईल.