गेल्या काही दिवसांपासून थंडबस्त्यात पडलेला राष्ट्रवादी विलीनीकरणाचा मुद्दा पुन्हा तापला आहे. शरद पवार हे आजारी असताना प्रफुल्ल पटेल यांनी त्यांची भेट घेतली आणि एकत्रीकरणाचा मुद्दा ऐरणीवर आला. ब्रीच कँडी रुग्णालयातून सुटी मिळाल्यावर ज्येष्ठ नेते शरद पवार यांनी बैठकांचा धडाका लावला. दोन्ही राष्ट्रवादीचे नेते त्यांच्या भेटीला आले. पार्थ पवार हे दोनदा भेटायला आले. या घडामोडींमुळे भाजपच्या नियोजनानुसार राष्ट्रवादीच्या विलीनीकरणाच्या पहिल्या अंकाचा पडदा उघडणार असल्याचा दावाही विश्लेषक करत आहेत. त्याचवेळी आमदार रोहित पवार यांनी मात्र वेगळा सूर आळवला आहे.
आमच्या पक्षात विलीनीकरणाची चर्चा नाही
सोमवारी रोहित पवार यांनी या चर्चेवर मोठी प्रतिक्रिया दिली होती. त्यांच्या म्हणण्यानुसार, आमची चर्चा वैयक्तिक, आरोग्य आणि दुष्काळाबाबत होती. त्याव्यतिरिक्त इतर कोणतीही चर्चा मी केली नाही. विलीनीकरणाबाबत तेही काही बोलले नाहीत, मीही काही बोललो नाही, असे त्यांनी सांगितले.
अजित पवार यांच्या अपघाताबाबत त्यांनी तपास संथ गतीने सुरू असल्याची शंका व्यक्त केली. तपास वेगाने पुढे जात नाही, त्यामुळे सत्ताधारी योग्य दिशेने तपास करत नाहीत, अशी आमची शंका आहे, असे ते म्हणाले. १५ नोव्हेंबरला ते महत्त्वाचे सादरीकरण करणार असून, त्यातून महत्त्वाच्या बाबी समोर येणार आहेत.
राज्यातल्या ९० टक्क्यांहून अधिक लोकांना हा अपघात नसून घातपात वाटतो, असे रोहित पवार यांचे म्हणणे आहे. या प्रकरणात अजून एफआयआरही नोंदवला गेलेला नाही, असे त्यांनी सांगितले. महाराष्ट्रात भाजप आणि सत्ताधाऱ्यांच्या विरोधात कोणी बोलत असेल, तर मी बोलत आहे, असेही ते म्हणाले. विलीनीकरणाची चर्चा केवळ माध्यमांमध्ये आणि अजित पवार यांच्या पक्षात सुरू आहे. आमच्या पक्षात तशी कोणतीही चर्चा नाही, असा दावा त्यांनी केला.
सूचक ट्विटची मोठी चर्चा
सत्य हेच तुमचं कर्म असेल, तर अपयशाची हिंमत नाही तुम्हाला रोखण्याची, या आशयाची व्हाटसअॅपवर आलेली ही रचना अत्यंत अर्थपूर्ण, प्रेरक आणि संघर्षाला बळ देणारी आहे. नक्की ऐका, असे आवाहन रोहित पवार यांनी केले आहे. या सूचक ट्विटमधून त्यांनी मोठा संदेश दिल्याचे मानले जात आहे. त्यांच्या या ट्विटमधून राष्ट्रवादीच्या विलीनीकरणाबाबत मोठा निर्णय होणार का, किंवा ते वेगळी वाट निवडतात की काय, याचीही चर्चा सुरू झाली आहे.
स्रोत: मूळ बातमी
Leave a Reply