कोल्हापूरची अस्मिता असलेल्या गोकुळ दूध संघाच्या अध्यक्षपदाच्या निवडणुकीत यंदा इतिहास घडला आहे. गेल्या २५ वर्षांपासून चालत आलेला माजी आमदार महादेवराव महाडिक यांचा लेटर पॅटर्न यंदा पूर्णपणे मागे पडला आहे. महायुतीचे १२ आणि समविचारी पक्षाचे १३ सदस्य आहेत. आज अध्यक्षपदाची निवड होणार आहे.
महाडिक पॅटर्न म्हणजे काय?
गेल्या २५ वर्षांपासून गोकुळच्या अध्यक्षपदाच्या निवडीवेळी महादेवराव महाडिक यांचाच शब्द अंतिम मानला जात होता. मतदानाच्या अवघ्या एक तास आधी एका बंद लिफाफ्यातून ते नव्या अध्यक्षाचे नाव पाठवायचे आणि त्याच नावावर मुहर लागायची. मात्र यंदा गोकुळमध्ये प्रत्यक्ष निवडणूक लागल्यामुळे महायुती सक्रिय झाली असून महाडिकांचा हा २५ वर्षांचा पॅटर्न निष्प्रभ ठरला आहे.
अध्यक्षपदासाठी रस्सीखेच; चार नावे चर्चेत
महाडिक पॅटर्न मागे पडल्याने आता महायुतीमधील तीनही पक्षांमध्ये अध्यक्षपदासाठी जोरदार रस्सीखेच सुरू आहे. तिन्ही पक्षांना सव्वा-सव्वा वर्षांचे अध्यक्षपद दिले जाण्याची शक्यता आहे. त्यासाठी महायुतीची तीन आणि समविचारीची एक, अशी चार नावे चर्चेत आहेत. भाजपकडून डॉ. चेतन नरके, शिंदे शिवसेनेकडून अजित नरके, राष्ट्रवादी काँग्रेसकडून (अजित पवार) रणजितसिंह पाटील आणि राजेश पाटील, तर समविचारी गटाकडून शशिकांत चुवेकर यांची नावे पुढे आली आहेत.
निवड प्रक्रियेत कोणताही गोंधळ किंवा कायदा-सुव्यवस्थेचा प्रश्न निर्माण होऊ नये, यासाठी गोकुळ शिरगाव पोलीस ठाण्याबाहेर मोठा पोलीस बंदोबस्त तैनात करण्यात आला आहे. वरिष्ठ पोलीस अधिकाऱ्यांसह महाराष्ट्र सुरक्षा बलाचे जवानही या ठिकाणी तैनात आहेत. शासन नियुक्त चार सदस्यही मतदानासाठी पोहोचले आहेत.
दरम्यान, गोकुळ दूध संघाच्या एकूण प्रकरणावर २४ नोव्हेंबर रोजी न्यायालयात महत्त्वाची सुनावणी होणार आहे. या सुनावणीबाबत काँग्रेस नेते सतेज पाटील यांनी सकारात्मकता दाखवली असून न्यायालयाकडून नक्कीच न्याय मिळेल, असा विश्वास व्यक्त केला आहे. शासननियुक्त चार संचालकांच्या मतदानाच्या अधिकाराबाबत न्यायालयाने दिलेल्या निर्णयाचा आपण आदर करतो, असेही त्यांनी स्पष्ट केले.
स्रोत: मूळ बातमी
Leave a Reply