दिवाळीच्या दिवसांत घराघरांत फराळ तयार होतो, दारात रांगोळ्या काढल्या जातात आणि कंदील लावले जातात. फटाके फोडून सण साजरा करण्याचा उत्साहही शिगेला पोहोचतो. मात्र याच उत्साहात कधी गरम तेलाचा हाताला चटका बसतो, तर कधी फटाक्यांमुळे भाजण्याची दुर्घटना घडते. अशा वेळी घरातील लोक घाबरून जातात आणि जखमेवर लगेच बर्फ, टूथपेस्ट किंवा एखादे मलम लावतात. पण असे घरगुती उपाय जखम अधिक गंभीर करू शकतात, त्यामुळे भाजल्यानंतरची पहिली २० मिनिटे अत्यंत महत्त्वाची ठरतात.
भाजल्यानंतर सर्वांत आधी काय करावे?
प्लास्टिक आणि पुनर्रचनात्मक शस्त्रक्रिया सल्लागार डॉ. अनुपम गोलाश यांच्या मते, भाजल्यानंतर सर्वांत आधी जखमी झालेला भाग थंड केला पाहिजे. भाजलेला भाग नळाच्या साध्या थंड पाण्याखाली २० मिनिटे ठेवावा. त्यामुळे त्वचेचे तापमान कमी होते आणि जखम अधिक गंभीर होत नाही. पण यासाठी बर्फासारखे अति थंड पाणी वापरणे टाळावे.
सूज येण्याआधी हातातील अंगठ्या, घड्याळ किंवा इतर घट्ट वस्तू काढून टाकाव्यात. तसेच त्वचेला कपडे चिकटलेले असतील, तर ते जबरदस्तीने ओढू नयेत.
जखम कशी झाकावी आणि काय टाळावे?
भाजलेला भाग थंड झाल्यानंतर स्वच्छ, मऊ आणि लिंट नसलेल्या कपड्याने तो सैल झाकावा. क्लिंग फिल्मचा एक थरही वापरता येतो, पण घट्ट गुंडाळणे टाळावे.
भाजल्यानंतर अनेक जण लगेच टूथपेस्ट, बर्फ, लोणी, तेल किंवा घरगुती मलम लावतात. पण असे करणे टाळावे, कारण त्यामुळे त्वचेला अधिक त्रास होऊ शकतो आणि संसर्गाचा धोका वाढू शकतो. भाजल्यामुळे फोड आले असतील, तर ते फोडू नयेत. कोणतीही जखम झाली, की घरगुती उपचारांवर अवलंबून न राहता डॉक्टरांकडे धाव घ्यावी.
लक्षात ठेवा, भाजल्यानंतरची पहिली २० मिनिटे महत्त्वाची असतात. योग्य पद्धतीने जखम थंड करा, घरगुती उपाय टाळा आणि गरज भासल्यास तातडीने डॉक्टरांचा सल्ला घ्या.
स्रोत: मूळ बातमी
Leave a Reply