संपूर्ण राज्याचं लक्ष लागलेल्या गोकुळ दूध संघाच्या अध्यक्षपदाची निवडणूक उद्या, १० नोव्हेंबर रोजी होणार आहे. त्याआधी गोकुळमध्ये संचालक नियुक्त करण्याच्या निर्णयाविरोधात कोल्हापुरात संघर्षमोर्चा काढण्यात आला. या मोर्चानंतर महायुतीचे नेते हसन मुश्रीफ, धनंजय महाडिक आणि प्रकाश आबिटकर यांनी पत्रकार परिषद घेतली. या पत्रकार परिषदेत त्यांनी उद्याच्या निवडणुकीत महायुतीचाच अध्यक्ष होईल, असा विश्वास व्यक्त केला.
महायुतीचे आरोप आणि भूमिका
पत्रकार परिषदेत महायुतीच्या नेत्यांनी आरोप केला की, सतेज पाटील यांच्याकडून खोटं चित्र उभं करण्यात आलं आणि गोकुळच्या विजयाचा उन्माद करण्यात आला. आजच्या संघर्षमोर्चात बाहेरच्या जिल्ह्यांतील लोक होते, असंही त्यांनी म्हटलं. धनंजय महाडिक म्हणाले की, महाराष्ट्र शासनाला दूध संघ ताब्यात ठेवायचा असता, तर प्रशासक नेमून तो ताब्यात घेता आला असता. सहकारात कोरमअभावी सभा होऊ शकते का, आणि याचा अधिकार जनरल बॉडीकडेच आहे, असा प्रश्नही त्यांनी उपस्थित केला. मोर्चात सहकारातील अनेक नेते आणि कारखानदार सहभागी झाले होते, असंही ते म्हणाले.
‘गोकुळ फक्त जिल्ह्यापुरतं’
हसन मुश्रीफ म्हणाले की, मोर्चाला कोल्हापुरातील नव्हे, तर बाहेरच्या जिल्ह्यांतील लोकच अधिक होते. गोकुळ दूध संघ हा डी. वाय. पाटील दूध संघ होण्यापासून वाचणार असल्याचा आनंद कोल्हापुरकरांना आहे, असंही त्यांनी म्हटलं. त्यांच्या १२ जणांनी अध्यक्ष निवडण्यासाठी हजर राहावं, असा आग्रह धरण्यात आला होता. विजयाचा उन्माद करण्यात आला आणि मुख्यमंत्र्यांबाबत अपमानजनक भाषा वापरण्यात आली, याबद्दल त्यांनी खंत व्यक्त केली. गोकुळ हा कोल्हापूर जिल्ह्याचा दूध संघ आहे आणि त्याचं कार्यक्षेत्र जिल्ह्यापुरतंच मर्यादित आहे, असं सांगत उद्याच्या निवडणुकीत महायुतीचाच अध्यक्ष होईल, असा विश्वास त्यांनी व्यक्त केला.
स्रोत: मूळ बातमी
Leave a Reply