धुळे तालुक्यातील विविध गावांतील पूल बांधकाम आणि रस्त्यांची सुधारणा व मजबुतीकरणासाठी सुमारे २३ कोटी रुपयांचा निधी मंजूर करण्यात आला आहे. या निधीमुळे अनेक वर्षांपासून प्रलंबित असलेले पूल आणि रस्त्यांचे प्रश्न कायमस्वरूपी मार्गी लागणार असल्याचे आमदार राम भदाणे यांनी सांगितले. ऐन दिवाळीत विकासकामांसाठी हा निधी मिळाल्याने ग्रामीण भागात आनंदाचे वातावरण आहे.
पुलांसाठी निधीचे वाटप
नेर येथील पुलाच्या बांधकामासाठी सर्वाधिक निधी मंजूर झाला आहे. पावसाळ्यात या ठिकाणी पांझरा नदीला पूर आल्यावर मोठी अडचण निर्माण व्हायची. नेर व इतर गावांतील शेतकरी, विद्यार्थी आणि रुग्णांना मोठ्या अडचणींना सामोरे जावे लागत होते. आता भक्कम पूल झाल्यावर ही अडचण कायमची दूर होणार आहे. कुसुंब्यातील पूल, धमाणे-न्याहळोद येथील पूल आणि सुट्रेपाडा पुलाच्या मंजुरीमुळे पावसाळ्यातील दळणवळणाचा प्रश्न सुटणार आहे.
रस्त्यांची जोडणी मजबूत होणार
धुळे ग्रामीणमधील रस्त्यांच्या कामांसाठीही भरीव निधी मिळाला आहे. बेंद्रेपाडा ते सोनेवाडी रस्त्यासाठी तीन कोटी आणि विश्वनाथ ते नावरा-नावरी रस्त्यासाठी दोन कोटी रुपये मंजूर झाले आहेत. विश्वनाथ ते नावरा-नावरी रस्त्यामुळे परिसरातील गावांची जोडणी अधिक मजबूत होणार आहे. मंजूर निधीमध्ये नेर गावाजवळील पांझरा पुलासाठी नऊ कोटी, कुसुंबा पुलासाठी तीन कोटी, धमाणे-न्याहळोद पुलासाठी तीन कोटी आणि सुट्रेपाडा पुलासाठी तीन कोटी रुपयांचा समावेश आहे.
स्रोत: मूळ बातमी
Leave a Reply