मुंबईत बांधकामांमुळे वाढणाऱ्या धुळीच्या प्रदूषणावर नियंत्रण आणण्यासाठी झोपडपट्टी पुनर्वसन प्राधिकरणाने एक नवा डिजिटल मार्ग निवडला आहे. नागरिकांच्या सहभागातून बांधकाम ठिकाणांवरील नियमांचे पालन तपासले जाणार असून, त्यासाठी ‘श्वास’ नावाचे स्वतंत्र ॲप सुरू करण्यात आले आहे.
मुंबई शहर आणि उपनगरांत सध्या प्राधिकरणाच्या अंतर्गत सुमारे ६२३ झोपडपट्टी पुनर्वसन प्रकल्प सुरू आहेत. महापालिकेच्या परिपत्रकानुसार प्रत्येक बांधकाम ठिकाणी हिरवे जाळे लावणे आणि धूळ नियंत्रणासाठी पाणी फवारणीची व्यवस्था ठेवणे बंधनकारक आहे. मात्र, अलीकडच्या तपासणीत ११६ ठिकाणी या उपाययोजना आढळल्या नाहीत. त्यामुळे त्या प्रकल्पांना काम थांबवण्याच्या नोटिसा देण्यात आल्या होत्या.
बारकोड स्कॅन करून थेट तक्रार
‘श्वास’ म्हणजे एसआरए हब फॉर वॉचिंग एअर पोल्यूशन अराउंड कंस्ट्रक्शन साइट. या ॲपच्या माध्यमातून प्रत्येक बांधकाम ठिकाणी बारकोड लावण्यात आले आहेत. त्या ठिकाणी प्रदूषण नियंत्रणाच्या नियमांचे पालन होत नसल्याचे नागरिकांच्या लक्षात आल्यास, त्यांना बारकोड स्कॅन करून प्राधिकरणाकडे थेट तक्रार नोंदवता येणार आहे. तक्रारीसोबत छायाचित्रही जोडता येईल, अशी माहिती प्राधिकरणाचे उपमुख्य अभियंता रामा मिटकर यांनी दिली.
त्रुटी दूर केल्याशिवाय काम सुरू होणार नाही
नागरिकांनी केलेल्या तक्रारीनंतर संबंधित विकासकाला नोटीस बजावून कारवाई करण्यात येईल. त्यानंतर विकासकाने आढळलेल्या त्रुटी दूर करून त्याची छायाचित्रे ॲपवर सादर केल्यानंतरच त्याला काम पुन्हा सुरू करण्याची परवानगी मिळेल. या व्यवस्थेमुळे नियम मोडणाऱ्या प्रकल्पांवर तातडीने लक्ष ठेवता येणार आहे. नागरिकांच्या सहभागातून प्रदूषण नियंत्रण अधिक प्रभावी होईल, असा प्राधिकरणाचा विश्वास आहे.
स्रोत: मूळ बातमी
Leave a Reply