शिरपूर तालुक्यातील तांडे येथील मुकेशभाई आर. पटेल सैनिकी शाळेत विशेष परिपाठ उपक्रमाची समारंभपूर्वक सांगता झाली. या वेळी तरडी येथील एसव्हीकेएम फार्मसीचे प्राचार्य डॉ. विवेककुमार रेदासनी आणि प्राचार्य दिनेशकुमार राणा उपस्थित होते. भारतीय प्रतिज्ञेचे वाचन करून विद्यार्थ्यांनी देशप्रेमाची शपथ घेतली. परिपाठ समिती प्रमुख स्नेहा बुरसे यांनी प्रास्ताविक केले, तर संस्कृती टापरे हिने सूत्रसंचालन केले. वर्षभर झालेल्या परिपाठांच्या मूल्यमापनानुसार नववीच्या वर्गाला प्रथम सत्र परिपाठ चषक बहाल करण्यात आला.
व्यवस्थापन संस्थेत संवाद सत्र
शिरपूर येथील आर. सी. पटेल इन्स्टिट्यूट ऑफ मॅनेजमेंट रिसर्च ॲन्ड डेव्हलपमेंटमध्ये आय. पी. आर. आणि इंडस्ट्री-इन्स्टिट्यूट इंटरॅक्शन कमिटीतर्फे इंडस्ट्री-इन्स्टिट्यूट संवाद सत्र नुकतेच घेण्यात आले. मुंबई येथील वरिष्ठ सल्लागार तथा समुपदेशक पूजा जोशी यांनी वित्तीय बाजारपेठ, म्युच्युअल फंड आणि गुंतवणुकीविषयी जागरूकता तसेच वित्त क्षेत्रातील विविध करिअर संधी यांविषयी मार्गदर्शन केले. बदलत्या आर्थिक परिस्थितीत वित्तीय ज्ञान, गुंतवणुकीचे नियोजन आणि व्यावसायिक कौशल्यांचे महत्त्व त्यांनी स्पष्ट केले. बँकिंग, वित्तीय सेवा, गुंतवणूक सल्लागार सेवा, म्युच्युअल फंड, आर्थिक नियोजन आणि संपत्ती व्यवस्थापन या क्षेत्रांतील करिअरच्या विविध संधींबाबत त्यांनी माहिती दिली. संस्थेच्या संचालिका डॉ. वैशाली पाटील यांच्यासह अनेक प्राध्यापकांनी संयोजन केले.
दिवाळी स्नेहमिलन आणि पीएच.डी. पदवी
वरूळ येथील आर. सी. पटेल इंग्लिश स्कूलमध्ये आजी-आजोबा दिन आणि दिवाळी स्नेहमिलन सोहळा नुकताच पार पडला. जवखेडा येथील सरपंच हिराबाई ठाकरे, समन्वयक भारती सोनवणे, मुख्याध्यापिका सपना मराठे आणि पालक उपस्थित होते. मुख्याध्यापिकांनी कार्यक्रमाचा उद्देश सांगितला. संगीत शिक्षक हंसराज कोळी आणि नृत्य शिक्षक श्यामकांत पवार यांच्या मार्गदर्शनाखाली स्वागतगीत सादर करण्यात आले. आजोबा आणि आजींना विविध खेळांत सहभागी करून घेण्यात आले. विविध उपक्रम सादर करणाऱ्या विद्यार्थ्यांपैकी विजेत्यांना भेटवस्तू देऊन गौरवण्यात आले.
इन्स्टिट्यूट ऑफ मॅनेजमेंट रिसर्च ॲन्ड डेव्हलपमेंटचे सहाय्यक प्राध्यापक महेश किशोर भावसार यांना जळगाव येथील कवयित्री बहिणाबाई चौधरी उत्तर महाराष्ट्र विद्यापीठाच्या वाणिज्य व व्यवस्थापन विद्याशाखेमार्फत पीएच. डी. पदवी नुकतीच प्रदान करण्यात आली. त्यांनी ऑनलाइन खरेदीविषयीच्या नोकरदार महिलांच्या खरेदी समजुती आणि समाधानावर शोधप्रबंध सादर केला होता. त्यांना धुळे येथील सिस्टेल इन्स्टिट्यूट ऑफ मॅनेजमेंट रिसर्चचे संचालक डॉ. हंसराज पाटील यांचे मार्गदर्शन लाभले.
शिरपूर येथील एच. आर. पटेल कन्या शाळेत दिवाळीत पाच दिवसांची पूजा मांडून प्रत्येक दिवसाचे महत्त्व विद्यार्थिनींना सांगण्यात आले. वसूबारस, धनत्रयोदशी, नरकचतुर्दशी, लक्ष्मीपूजन, बलिप्रतिपदा आणि भाऊबीज हे सण साजरे करून त्याबाबत माहिती देण्यात आली. सहभागींना प्रदूषणमुक्त दिवाळीची शपथ देण्यात आली.
स्रोत: मूळ बातमी
Leave a Reply