काळगाव (ता. साक्री) येथे फलज्योतिष आणि बुवाबाजीला विरोध करणारी ग्रामपरिषद नुकतीच झाली. अंधश्रद्धा निर्मूलन समितीच्या वतीने ही परिषद भरवण्यात आली होती. लोकांमध्ये वैज्ञानिक दृष्टिकोन रुजवणे हाच या परिषदेचा मुख्य उद्देश होता.
समितीचे राज्य कार्याध्यक्ष संजय बनसोडे यांनी परिषदेत मार्गदर्शन केले. महाराष्ट्र ही संत आणि सुधारकांची भूमी असल्याचे त्यांनी सांगितले. बाराव्या शतकापासून संत गाडगेबाबा आणि तुकडोजी महाराजांपर्यंतच्या संत परंपरेने जातीव्यवस्थेवर प्रहार केला आणि महिलांना समानतेची वागणूक दिली, असे ते म्हणाले. महात्मा फुलेंचे हे दोनशेवे जयंती वर्ष असून, ज्योतिबांनी धर्मातील अमानवीय रुढी-परंपरांविरुद्ध संघर्ष केला, याकडेही त्यांनी लक्ष वेधले. मात्र आज पुन्हा भोंदू बुवा-बाबांचा सुळसुळाट झाला आहे आणि त्यापासून दूर राहण्यासाठी वैज्ञानिक दृष्टिकोन अंगीकारणे गरजेचे आहे, अशी अपेक्षा त्यांनी व्यक्त केली.
ज्योतिषातील फोलपणा उलगडून दाखवला
खगोल विज्ञानाचे अभ्यासक प्रा. डॉ. नितीन शिंदे यांनी शनीची साडेसाती, कडक मंगळ, कालसर्प योग, नारायण नागबळी आणि वास्तुशास्त्र यातील फोलपणा आणि अशास्त्रीयता स्पष्ट केली. समितीचे राज्य सरचिटणीस सुरेश बोरसे आणि राज्य कार्यवाह प्रा. परेश शाह हेही उपस्थित होते. प्रा. शाह यांनी साक्री तालुक्याची सत्यशोधकी विचारांची परंपरा आणि स्वातंत्र्य चळवळीतील योगदान यावर प्रकाश टाकला.
चमत्काराचे प्रयोग आणि प्रबोधनाची गाणी
प्रा. बोरसे आणि रणजित शिंदे यांनी चमत्काराचे प्रयोग दाखवून जनजागृती केली. श्वेता गवळे या युवतीने प्रबोधनाची गाणी सादर केली. परिषदेचे निमंत्रक नवल ठाकरे हे आयोजक होते. परिषदेदरम्यान वीजपुरवठा नसल्यामुळे प्रोजेक्टरचा उपयोग करता आला नाही आणि अंधारातच कार्यक्रम करावा लागला. त्यामुळे वीजवितरण कंपनीवर ग्रामस्थांनी रोष व्यक्त केला.
स्रोत: मूळ बातमी
Leave a Reply