दिवाळी म्हटली की घरात मिठाई, फराळ आणि गोड पदार्थांची रेलचेल असते. दिवाळीत अनेकदा घरात पेढे, बर्फी, गुलाबजामुन किंवा लाडू उरतात. ही मिठाई पुन्हा पुन्हा खाण्याऐवजी त्यापासून काहीतरी नवीन आणि हटके पदार्थ बनवता येतात. उरलेल्या मिठाईचा वापर करून स्वादिष्ट डेझर्ट तयार करता येतात. दिवाळीत उरलेल्या मिठाईपासून बनवता येणाऱ्या दोन सोप्या आणि चविष्ट रेसिपी जाणून घ्या.
उरलेल्या पेढ्यांपासून मलाई पेढा कुल्फी
या कुल्फीसाठी उरलेले पेढे, दूध, मिल्क पावडर, क्रीम, चिमूटभर वेलची पूड आणि बदाम-पिस्त्याचे काप लागतात. एका पातेल्यात दूध घेऊन मंद आचेवर गरम करून थोडे आटवा. पेढे हाताने कुस्करून गरम दुधात मिसळा. त्यात मिल्क पावडर आणि क्रीम घालून मिश्रण व्यवस्थित एकजीव करा. वेलची पूड आणि बदाम-पिस्त्याचे काप घाला. मिश्रण पूर्णपणे थंड झाल्यानंतर कुल्फीच्या साच्यांमध्ये भरा. साचे फ्रीजरमध्ये सहा ते आठ तास किंवा कुल्फी पूर्णपणे सेट होईपर्यंत ठेवा. कुल्फी साच्यातून बाहेर काढून वरून ड्रायफ्रूट्स घालून सर्व्ह करा. पेढे गोड असल्यामुळे अतिरिक्त साखर घालण्याची गरज नसते.
उरलेल्या गुलाबजामुनपासून गुलाबजामुन रबडी
या रबडीसाठी गुलाबजामुन, दूध, साखर, बदाम, पिस्ते, चिमूटभर वेलची पूड आणि केशर लागते. सर्वप्रथम जाड बुडाच्या पातेल्यात दूध घेऊन मंद आचेवर गरम करा. दूध उकळल्यानंतर सतत ढवळत ते थोडे घट्ट होऊ द्या. दूध आटून त्याची रबडीसारखी घट्टसर पोत तयार होईल. त्यात वेलची पूड, केशर आणि आवश्यकतेनुसार साखर घाला. गुलाबजामुन आधीच गोड असल्यामुळे साखर कमी घालावी. गुलाबजामुनचे छोटे तुकडे करा आणि तयार रबडीमध्ये घाला. वरून बदाम-पिस्त्याचे काप घालून मिश्रण थंड होऊ द्या. फ्रिजमध्ये थंड करून सर्व्ह करा. गुलाबजामुन पाकात भिजलेले असल्यामुळे रबडीमध्ये अतिरिक्त साखर घालण्यापूर्वी चव तपासा.
स्रोत: मूळ बातमी
Leave a Reply