पाय मुरगळणे, चालताना पायाला मुका मार लागणे किंवा घसरून पडल्यामुळे पायाला सूज आणि वेदना होणे ही सामान्य समस्या आहे. अशा वेळी चालताना त्रास होतो, पायावर वजन ठेवता येत नाही आणि जखम झालेल्या ठिकाणी सूज दिसून येते. अनेकदा किरकोळ दुखापतीवर घरच्या घरी प्राथमिक उपचार करता येतात.
बर्फाचा शेक आणि विश्रांती
पाय मुरगळल्यानंतर सूज आणि वेदना कमी करण्यासाठी थंड शेक द्या. थंड शेकमुळे वेदना कमी होण्यास आणि सूज नियंत्रित करण्यास मदत होऊ शकते. बर्फाचे तुकडे स्वच्छ कापडात गुंडाळून दुखापत झालेल्या भागावर पंधरा ते वीस मिनिटे ठेवा. बर्फ थेट त्वचेवर लावू नका. पाय मुरगळल्यानंतर लगेच चालणे, धावणे किंवा जास्त वेळ उभे राहणे टाळावे. दुखापत झालेल्या पायावर जास्त वजन देऊ नका. शक्य असल्यास काही काळ विश्रांती घ्या आणि वेदना वाढवणाऱ्या हालचाली टाळा. वेदना कमी होत असताना हळूहळू हालचाल सुरू करा.
पाय उंचावर ठेवा, बँडेजचा आधार घ्या
पायाला सूज आल्यास तो हृदयाच्या पातळीपेक्षा उंच ठेवण्याचा प्रयत्न करा. झोपताना किंवा बसताना पायाखाली उशी ठेवा. त्यामुळे सूज कमी होण्यास मदत होऊ शकते. विशेषतः दुखापतीनंतरच्या पहिल्या चोवीस ते अठ्ठेचाळीस तासांत हा उपाय उपयुक्त ठरू शकतो. घोट्याला सूज आली असेल तर योग्य पद्धतीने क्रेप बँडेज बांधल्याने आधार मिळू शकतो. बँडेज हलक्या दाबाने बांधा, खूप घट्ट बांधू नका. बोटे सुन्न होणे, निळसर दिसणे किंवा थंड पडणे जाणवल्यास बँडेज सैल करा किंवा काढा.
दुखापत झाल्यानंतर लगेच जोरदार मालिश केल्याने सूज आणि वेदना वाढू शकतात. त्यामुळे पहिल्या अठ्ठेचाळीस तासांत मालिश टाळणे अधिक सुरक्षित आहे. कोमट तेलात आंबे हळद मिसळून पायाला लावता येते. मुका मार लागल्यामुळे त्वचेखालील रक्तवाहिन्यांना इजा होऊ शकते आणि त्वचेवर निळसर, जांभळा किंवा काळसर डाग दिसतो. मुका मार किरकोळ असल्यास डाग हळूहळू कमी होऊ शकतो. मात्र, मोठ्या प्रमाणात सूज किंवा तीव्र वेदना असल्यास वैद्यकीय तपासणी आवश्यक आहे. दुखापतीतून बरे होण्यासाठी संतुलित आहार महत्त्वाचा आहे. प्रथिनांसाठी डाळी, कडधान्ये, अंडी किंवा दूध, व्हिटॅमिन सीसाठी आवळा, संत्री, लिंबू आणि पेरू, तर कॅल्शियमसाठी दूध आणि दही यांचा आहारात समावेश करा. शरीरात पाण्याची कमतरता होऊ देऊ नका. कोणतेही उपचार किंवा औषध तज्ज्ञांच्या किंवा डॉक्टरांच्या सल्ल्यानेच घ्यावीत.
स्रोत: मूळ बातमी
Leave a Reply