गोकुळच्या निकालानंतर कोरम पूर्ण होत नसल्याने चार शासन नियुक्त संचालकांच्या निर्णयावरून कोल्हापुरात वातावरण तापले आहे. या निर्णयाविरोधात पुकारलेल्या आंदोलनात सहभागी होण्यासाठी आंदोलक जमण्यास सुरुवात झाली आहे. कोल्हापुरात काढण्यात येणाऱ्या मोर्चाकडे संपूर्ण राज्याचे लक्ष लागले आहे.
गोकुळच्या पंचवीस पैकी तेरा जागा जिंकलेल्या राजर्षी शाहू शेतकरी समविचारी आघाडीचे नेते सतेज पाटील यांनी या निर्णयाविरोधात रस्त्यावरची लढाई आणि न्यायालयीन लढाई अशा दोन्ही पातळ्यांवर लढण्याची घोषणा केली आहे. समविचारी आघाडीचा मोर्चा दसरा चौकातून जिल्हाधिकारी कार्यालयावर काढला जाणार आहे.
बॅनरबाजीने वेधले लक्ष
कोल्हापुरात काढण्यात आलेल्या मोर्चात महायुतीच्या नेत्यांविरोधातील संताप बॅनरबाजीतही दिसून आला. ‘लक्षात ठेवलंय 2029 हे कोल्हापूर हाय’, ‘ही संघर्षाची शेवटची दिवाळी असू दे, हे कोल्हापूर हाय’, ‘गोकुळसाठी एवढा रडीचा डाव खेळणारे’ अशा विविध आशयाचे बॅनर पाहायला मिळत आहेत. एका बॅनरवर एक खासदार कमी होता म्हणून राजीनामा देणारे अटलजी कुठे आणि एक संचालक कमी आहे म्हणून चार संचालक नियुक्त करणारे कुठे, असा सवालही उपस्थित करण्यात आला आहे. या आंदोलनात कोल्हापुरी पायताणही प्रतीकात्मक स्वरूपात आणण्यात आले आहे.
ऐतिहासिक मोर्चाकडे राज्याचे लक्ष
कोल्हापुरातील ऐतिहासिक दसरा चौकामध्ये लावण्यात आलेले पोस्टर्सही चांगलेच लक्ष वेधून घेत आहेत. गोकुळच्या मुद्द्यावरून तापलेले वातावरण आणि आंदोलकांचा आक्रमक पवित्रा पाहता या मोर्चाकडे संपूर्ण राज्याचे लक्ष लागले आहे. पुढील काळात हा वाद कोणते वळण घेतो, याकडे सर्वांचे लक्ष असेल.
स्रोत: मूळ बातमी
Leave a Reply